கள்ளச்சாராயம் கடத்திய இருவர் குண்டர் சட்டத்தின் கீழ் கைது!

செங்கல்பட்டு: மதுராந்தகம் அருகே தொடர்ந்து கள்ளச்சாராயம் கடத்தி விற்பனை செய்து வந்த இருவரைக் காவலர்கள் குண்டர் சட்டத்தின் கீழ் கைதுசெய்தனர்.

செங்கல்பட்டு மாவட்டம் மதுராந்தகம் அடுத்துள்ள கரசங்கால் பகுதியைச் சேர்ந்தவர் விமல்ராஜ். இவரும் விழுப்புரம் மாவட்டம் சலாவதி கிராமத்தைச் சேர்ந்த மாரி (எ)நண்டு மாரியும் திருவண்ணாமலை, விழுப்புரம், செங்கல்பட்டு ஆகிய மாவட்டங்களிலிருந்து லாரி மூலம் கள்ளச்சாராயம் கடத்தி விற்பனை செய்து வந்துள்ளனர்.

இவர்கள் கடந்த 15 தினங்களுக்கு முன்பு சுமார் 30 லட்ச ரூபாய் மதிப்புடைய கள்ளச்சாராயம் ஏற்றி வந்துள்ளனர். அப்போது ஒரத்தி அருகே செல்லும் போது, லாரியை மடக்கி காவல் துறையினர் இருவரையும் கைது செய்தனர்.

விசாரணையில் இவர்கள் பல ஆண்டுகளாக கள்ளச்சாராயம் கடத்தி வந்ததும், காவல் துறையினரிடம் சிக்காமலிருந்ததும் தெரியவந்தது. மேலும் இவர்கள் மீது ஏற்கனவே கள்ளச்சாராயம் கடத்தல் வழக்கு இருப்பதால், இவர்களைக் குண்டர் சட்டத்தில் கைது செய்ய செங்கல்பட்டு மாவட்ட ஆட்சியர் ஜான் லூயிஸ் உத்தரவிட்டார்.

அந்த உத்தரவின் பேரில் ஒரத்தி காவல் துறையினர், அவர்களைக் குண்டர் சட்டத்தில் கைது செய்து புழல் சிறையில் அடைத்தனர்.