சென்னை, திருவள்ளூர், காஞ்சிபுரம், செங்கல்பட்டு ஆகிய மாவட்டங்களில் கரோனா வைரஸ் தொற்று அதிகரித்து வருகிறது. இவற்றைக் கட்டுப்படுத்தவும், இங்கிருந்து பிற மாவட்டங்களுக்கு தொற்று பரவுவதைத் தடுக்கும் முயற்சியிலும், அரசு அலுவலர்கள் ஈடுபட்டு வருகின்றனர்.
இந்நிலையில், சென்னையிலிருந்து, தென் மாவட்டங்களுக்குச் செல்லும் அனைத்து வாகனங்களையும் சோதனை செய்ய, காவல் துறையினருக்கு, மாவட்ட காவல் கண்காணிப்பாளர் கண்ணன் உத்தரவிட்டார். இதையடுத்து, வண்டலுார், பரனுார், ஆத்தூர் ஆகிய சுங்கச்சாவடிகள் உள்ளிட்ட பல்வேறு பகுதிகளில் காவல் துறையினர் ரோந்துப் பணியில் ஈடுபட்டுள்ளனர். சுங்கச்சாவடி வழியாக செல்லும் வாகனங்களை கடுமையாக சோதனைக்கும் உட்படுத்துகின்றனர்.
