தேர்தல் பணியில் ஈடுபடும் அலுவலர்கள் ஆசிரியர்களுக்கு நேற்று அளிக்கப்பட்ட இரண்டாம் கட்ட பயிற்சியில் தபால் வாக்குகள் அளிக்க ஏற்பாடுகள் செய்யப்பட்டிருந்தன. ஆனால் அனைவருக்கும் தபால் வாக்குகள் அளிக்காமலும், தபால் வாக்கு செலுத்துவதற்குரிய தேர்தல் பணி சான்று அளிக்காமலும் தேர்தல் நடத்தும் அலுவலர்கள் உள்ளனர் எனக் குற்றச்சாட்டு எழுந்துள்ளது.
இதுகுறித்து தமிழ்நாடு ஆரம்பப் பள்ளி ஆசிரியர் கூட்டமைப்பின் மாநிலத் தலைவர் மணிமேகலை, பொதுச்செயலாளர் மயில், மாநிலப் பொருளாளர் ஜோதிபாபு ஆகியோர் வெளியிட்டுள்ள அறிக்கையில்,
’17ஆவது மக்களவைத் தேர்தலுக்குரிய பணிகள் வெகுவேகமாக நடைபெற்றுக் கொண்டிருக்கின்றன. தமிழகத்தில் தேர்தலுக்கு இன்னும் பத்து தினங்கள் மட்டுமே உள்ள நிலையில் தேர்தல் பணியில் ஈடுபடும் ஆசிரியர்கள் மற்றும் அரசு ஊழியர்களுக்குத் தபால் வாக்குகள் அளிப்பதில் தமிழ்நாடு முழுவதும் தேர்தல் ஆணைய அதிகாரிகள் மிகுந்த மெத்தனப் போக்குடனும் காழ்ப்புணர்ச்சியுடனும் நடந்து வருகின்றனர். இதனால் லட்சக்கணக்கான ஆசிரியர்களும், அரசு ஊழியர்களும் தங்களது ஜனநாயகக் கடமையை ஆற்ற முடியுமா என்ற கேள்வி எழுந்துள்ளது.
மார்ச் 24, 31 ஆகிய தேதிகளில் நடைபெற்ற முதல் தேர்தல் பயிற்சி வகுப்பில் தபால் வாக்குக்கோரி படிவம் 12-ல் விண்ணப்பித்த ஆசிரியர்கள், அரசு ஊழியர்களில் பெரும்பாலானோருக்கு ஏப்ரல் 7ஆம் தேதி நடைபெற்ற இரண்டாவது பயிற்சி வகுப்பில் தபால் வாக்குகள் அளிக்கப்படவில்லை. மிகக்குறைந்த எண்ணிக்கையிலேயே தபால் வாக்குகள் அளிக்கப்பட்டுள்ளன. இதனால் மாநிலம் முழுவதும் தேர்தல் பணியில் ஈடுபடும் ஆசிரியர்கள் மற்றும் அரசு ஊழியர்கள் மத்தியில் மிகப்பெரிய அதிருப்தியும், கொந்தளிப்பும், ஏமாற்றமும் ஏற்பட்டுள்ளது.
அதேபோன்று சொந்த மக்களவைத் தொகுதியில் தேர்தல் பணியாற்றும் தேர்தல் பணியாளர்கள் முதல் பயிற்சி வகுப்பில் படிவம் 12-ஏ-ல் விண்ணப்பித்துள்ளனர். அவர்களுக்கும் தேர்தல் பணி சான்று வழங்கப்பட்டு அவர்கள் பணியாற்றும் வாக்குச்சாவடியிலேயே வாக்களிக்கும் வாய்ப்பும் வழங்கப்படுமா? என்ற சந்தேகம் தமிழ்நாடு முழுவதும் தேர்தல் பணிக்குச் செல்லும் ஆசிரியர்கள் மற்றும் அரசு ஊழியர்கள் மத்தியில் வலுவாக எழுந்துள்ளது.
ஆசிரியர்கள், அரசு ஊழியர்களின் வாக்குகள் முழுமையாகப் பதிவு செய்யாமல் தேர்தல் ஆணையம் எவ்வாறு 100 விழுக்காடு வாக்குப்பதிவு இலக்கை எட்டும்.
தேர்தல் பணியில் ஈடுபட்டுள்ள ஆசிரியர்களும், அரசு ஊழியர்களும் இந்திய குடிமக்கள் என்ற முறையில் வாக்களிக்கும் உரிமை பெற்றவர்கள். அந்த உரிமையை யாராலும் தட்டிப்பறிக்க முடியாது. அவ்வாறு தட்டிப்பறிப்பது என்பது மிகப்பெரிய தேசவிரோதச் செயலாகும்’ எனக் கூறப்பட்டுள்ளது..
திமுக சார்பில் இந்தியத் தேர்தல் ஆணையத்திற்கு அனுப்பியுள்ள கடிதத்தில் தேர்தல் பணியில் ஈடுபடும் அலுவலர்கள் மற்றும் ஆசிரியர்களுக்குத் தபால் வாக்குகள் செலுத்துவதற்கான தேர்தல் பணி சான்று வழங்குவதில் தாமதம் செய்கின்றனர். எனவே நூறு விழுக்காடு வாக்குப்பதிவு என்பதை இந்தியத் தேர்தல் ஆணையம் நிறைவேற்ற முடியாது.
இதில் தேர்தல் ஆணையம் தலையிட்டுத் தேர்தல் பணியில் ஈடுபட்டுள்ளவர்களுக்குத் தபால் வாக்குகளை அளிக்க நடவடிக்கை மேற்கொள்ள வேண்டும் எனத் தெரிவிக்கப்பட்டுள்ளது.
