தென் சென்னையில் கலகலக்கும் தேர்தல் களம்: கட்டுகட்டாக பணப் பட்டுவாடா!

சென்னை: தென்சென்னையில் தேர்தல் விதிமுறைக்கு முரணாக பணப்பட்டுவாடா செய்த பிற கட்சியைச் சேர்ந்த இரண்டு நபர்களை அதிமுகவினர் சிறைபிடித்து காவல்துறையில் ஒப்படைத்தனர்.

தென் சென்னை தொகுதிக்குட்பட்ட சைதாப்பேட்டை பகுதியில் இரவில் வீடு வீடாகச் சென்று பிற அரசியல் கட்சியைச் சேர்ந்த நபர்கள் பணம் பட்டுவாடா செய்வதாக அதிமுகவினருக்கு தகவல் கிடைத்துள்ளது. தகவலின் பேரில் அங்குச் சென்ற அதிமுகவினர், அங்கு வாக்குக்கு தலா ரூபாய் 200 கொடுத்துக் கொண்டிருந்த பாபு, குமார் ஆகிய இரண்டு பேரையும் பிடித்து குமரன் நகர் காவல் நிலையத்தில் ஒப்படைத்தனர்.

இதனையடுத்து காவல் துறையினர் வழக்குப் பதிவு செய்து இரண்டு பேரிடமும் விசாரணை மேற்கொண்டு வருகின்றனர். மேலும் வீடு வீடாகச் சென்று வாக்குக்கு தலா ரூபாய் 200 வழங்கிய காணொளி ஆதாரத்தையும் அதிமுகவினர் காவல் நிலையத்தில் வழங்கியுள்ளனர். அதுமட்டுமின்றி பணம் பட்டுவாடா செய்தவர்களை அதிமுகவினர் பிடிக்கும் போது தேர்தல் பறக்கும் படை அதிகாரிகள் யாரும் அங்கு இல்லை என்பது குறிப்பிடத்தக்கது.