நாற்பதும் நமதே, நாடும் நமதே - அமைச்சர் ஜெயக்குமார்

சென்னை: நடக்க இருகின்ற நாடாளுமன்றத்தில் 'நாற்பதும் நமதே நாடும் நமதே' என்பதை போல் அனைத்தையும் கைப்பற்றுவோம் என அமைச்சர் ஜெயக்குமார் கூறியுள்ளார்

மத்திய சென்னை மக்களவை தொகுதி சாம் பாலை ஆதரித்து சென்னை சூளைமேட்டில் அ.தி.மு.க அமைச்சர் ஜெயக்குமார், பா.ம.க இளைஞரணித் தலைவர் மருத்துவர் அன்புமணி ராமதாஸ் ஆகியோர் பரப்புரையில் ஈடுபட்டனர்.

பின்னர் செய்தியாளர்களை சந்தித்து பேசிய அமைச்சர் ஜெயக்குமார், “அனைந்திந்திய அண்ணா திராவிட முன்னேற்ற கழக தலைமையிலான கூட்டணி மகத்தான வெற்றி பெறும். அ.தி.மு.க வேட்பாளர்கள் மற்றும் கூட்டணி கட்சி வேட்பாளர்கள் போட்டியிடும் தொகுதிகளில் மகத்தான எழுச்சியை காண முடிகிறது. எனவே நாற்பதும் நமதே, நாடும் நமதே என்பதை போல் அனைத்து தொகுதிகளையும் நாங்கள் கைப்பற்றுவோம்.

முன்னாள் அமைச்சர் துரைமுருகன் வீட்டில் வருமான வரித்துறையினர் சோதனை நடத்திய போது 10 லட்சம் சிக்கியது. அப்போது துரைமுருகன் வந்தார், எடுத்துக்கொண்டார்கள் என்று பதற்றமின்றி கூறினார். தற்போது அவருக்கு சொந்தமான குடோன்கள், கல்லூரியிலிருந்து 32 கோடி ரூபாய் கிடைத்துள்ளதாக தகவல் வெளிவந்துள்ளது என்று தெரிவித்தார்.