அரியலூர் மாவட்டத்தில், சென்னை கோயம்பேடு சந்தையில் கூலித்தொழிலாளியாக வேலை பார்த்த நமங்குணம் காலனித் தெருவில் வசிக்கும் 35 வயதாகும் நபருக்கு, கடந்த 30ஆம் தேதி கரோனா வைரஸ் தொற்று இருப்பது உறுதிசெய்யப்பட்டது.
இதனையடுத்து கோயம்பேட்டிலிருந்து அரியலூர் மாவட்டத்திற்கு வந்த சுமார் 50 பேருக்கு நடத்தப்பட்ட பரிசோதனையில் நேற்று ஒரே நாளில் பல்வேறு கிராமங்களைச் சேர்ந்த 19 பேருக்கு கரோனா வைரஸ் தொற்று உறுதிசெய்யப்பட்டது.
இதனையடுத்து அரியலூர் மாவட்ட எல்லைகளில் உள்ள சோதனைச் சாவடிகளில் தீவிர கண்காணிப்பு செய்யப்பட்டதில், நேற்று ஒரேநாளில் மட்டும் 165 பேர் கோயம்பேட்டிலிருந்து அரியலூர் மாவட்ட எல்லைக்கு வந்த போது அடையாளம் காணப்பட்டு தனிமைப்படுத்தப்பட்டனர். 165 பேருக்கு நடத்தப்பட்ட பரிசோதனையில் 5 பேர் சளி, காய்ச்சல் அறிகுறிகளுடன் தென்பட்டதால், அவர்கள் அரியலூர் அரசு தலைமை மருத்துவமனையில் உள்ள கரோனா சிறப்பு வார்டில் அனுமதிக்கப்பட்டு சிகிச்சைப் பெற்று வருகின்றனர்.
மீதமுள்ள 160 பேரும் அரியலூர் அரசு கலைக்கல்லூரி உள்ளிட்ட ஐந்து முகாம்களில் தங்க வைக்கப்பட்டு கண்காணிப்பில் வைக்கப்பட்டுள்ளனர். அவர்களுக்குத் தேவையான உணவு உள்ளிட்ட அத்தியாவசியப் பொருள்களும் வழங்கப்பட்டுள்ளது.
மேலும், பல்வேறு கிராமங்களில் கோயம்பேட்டில் இருந்து வருகை தந்த 62 பேர் அடையாளம் காணப்பட்டு, தத்தமது வீடுகளில் தனிமைப்படுத்தப்பட்டுள்ளனர். நேற்று ஒரேநாளில் முகாம்களில் உள்ள 160 பேரும், வீடுகளில் தனிமைப்படுத்தப்பட்டுள்ள 62 பேரும் என மொத்தம் 222 பேருக்கு சளி மற்றும் ரத்த மாதிரிகள் எடுக்கப்பட்டு சென்னைக்கு பரிசோதனைக்கு அனுப்பப்பட்டுள்ளது.
இந்நிலையில் இன்று காலையில் கடந்த 30ஆம் தேதி பரிசோதனை செய்யப்பட்ட பெரியாக்குறிச்சி, நத்தைகுழி கிராமங்களைச் சேர்ந்த கோயம்பேடு கூலித்தொழிலாளர்கள் இரண்டு பேருக்கு கரோனா தொற்று உறுதி செய்யப்பட்டதையடுத்து, அரியலூர் மாவட்ட மக்கள் அச்சமடைந்துள்ளனர்.
அரியலூர் மாவட்டத்தில் கரோனாவால் பாதிக்கப்பட்டவர்களின் எண்ணிக்கை 29ஆக உயர்ந்துள்ள நிலையில், 222 பேரின் பரிசோதனை முடிவுகள் எப்படி வருமோ என்ற கவலையும் ஏற்பட்டுள்ளது.
இதையும் படிங்க...தமிழ்நாட்டின் வூஹான் ஆன கோயம்பேடு; தவறு எங்கே நடந்தது?
