டேவிட் பெக்காம் என்றதும் இங்கிலாந்து கால்பந்து வீரர் டேவிட் பெக்காம்தான் அனைவருக்கும் நினைவில் வருவார். ஆனால் இந்த டேவிட் பெக்காம் இந்தியாவின் அந்தமான் தீவைச் சேர்ந்தவர். 17 வயதே நிரம்பியுள்ள டேவிட் பெக்காம், தனது அசாத்திய திறமைகளால் கவுகாத்தியில் நடக்கும் கேலோ இந்தியா யூத் கேம்ஸ் போட்டிகளில் அனைவரின் கவனத்தையும் ஈர்த்துள்ளார்.
இவர் ஒரு சைக்கிளிங் வீரர். டேவிட் பெக்காம் என்ற பெயர் குறித்து அவரிடம் பேசுகையில், '' எனது குடும்பத்தினர் கால்பந்து வீரர் டேவிட் பெக்காமின் மிகத் தீவிர ரசிகர்கள். நான் பிறந்தவுடனேயே எனக்கு டேவிட் பெக்காம் பெயரினை வைத்துவிட்டார்கள். இப்போது நானும் டேவிட் பெக்காம் ரசிகன்தான். நானும் கால்பந்து விளையாடுவேன். சுக்ரடோ கால்பந்து தொடரில் விளையாடியுள்ளேன். ஆனால் நான் சைக்கிளிங் போட்டிகளில் பங்கேற்பதற்கு எனது தாத்தாதான் காரணம்'' என்றார்.
டேவிட் பெக்காம் 2017ஆம் ஆண்டு டெல்லியில் நடந்த தேசிய அளவிலான சைக்கிள் பந்தயத்தில் வெள்ளிப்பதக்கம் வென்றுள்ளார்.
சைக்களிங் பற்றி பேசுகையில், ’’ நான் எனது சைக்கிளிங் பயிற்சியை 2017ஆம் ஆண்டில்தான் தொடங்கினேன். பயிற்சியின் தொடக்கத்தில், சைக்கிள் மீது அமர்ந்தால் எனது கால்கள் தரையை எட்டாது, ஆனாலும் நான் சைக்கிளிங்கில் சிறப்பாக செயல்பட்டேன். அந்தமான் போன்ற இடங்களில் சைக்கிளிங் பயிற்சிகளுக்கு போதிய வசதிகள் கிடையாது'' என்றார்.
டேவிட் பெக்காம் குடும்பம் பற்றி விசாரிக்கையில், அவரது சிறு வயதிலேயே அப்பா 2004 சுனாமியில் உயிரிழந்ததாகவும், 2014ஆம் ஆண்டு அம்மா உடல்நலம் சரியில்லாததால் உயிரிழந்ததாகவும் தெரியவந்துள்ளது. தற்போது டேவிட் பெக்காம், அவரின் தாத்தாவுடன் தங்கியுள்ளார்.
எதிர்காலத்தில் சைக்கிளிங் ஆசை பற்றி பேசுகையில், '' இதுவரை நான் பெரிதாக எந்த குறிக்கோளும் வைத்துக்கொள்ளவில்லை. எனது பயிற்சியில் சிறப்பாக செயல்பட வேண்டும் என தீர்மானித்துள்ளேன். எதிர்காலத்தில் எனது உழைப்பிற்கு ஏற்ப சாதனைகள் படைப்பேன் என நம்புகிறேன்'' என்றார்.
இதையும் படிங்க: நிஜ டான்களிடம் சரண்டரான இந்தியா!
