2019ஆம் ஆண்டுக்கான இந்தியன் பாக்ஸிங் லீக் டெல்லியில் உள்ள இந்திரா காந்தி உள்விளையாட்டு அரங்கில் நடைபெற்று வருகிறது. அதன் நேற்றையப் போட்டியில் வலிமையான பஞ்சாப் பாந்தர்ஸ் அணியை எதிர்த்து பெங்களூரு ப்ராலர்ஸ் அணி விளையாடியது.
லீக் சுற்றுகளில் பஞ்சாப் அணிக்கு இது கடைசி போட்டி என்பதால், அந்த அணியின் முக்கிய வீரர்களான மேரி கோம், உஸ்பெகிஸ்தான் வீரர் அப்துல் மாலிக், மனோஜ் குமார் ஆகியோருக்கு ஓய்வளிக்கப்பட்டு, நான்கு புதிய வீரர்களைக் களமிறக்கியது.
இதில் தொடக்கப் போட்டியில் களமிறங்கிய 51 கிலோ எடைப் பிரிவில் அனாமிகா களமிறங்கி தர்ஷனாவை வீழ்த்த, அதையடுத்து களமிறங்கிய பஞ்சாப் அணியின் ப்ரசாத் பெங்களூரு அணியின் ஆஷிஷை வீழ்த்தி 1-1 என புள்ளிகளை ஈடுசெய்தார்.
இதையடுத்து பெங்களூரு அணியின் தினேஷ் தாகர் பஞ்சாப் அணியின் யஷ்பாலை வீழ்த்த, மீண்டும் 2-1 என பெங்களூரு அணி முன்னிலை பெற்றது.
பின்னர் களமிறங்கிய பெங்களூரு அணி கேப்டன் சிம்ரன்ஜித் கவுர் தொடர்ந்து தனது நான்காவது வெற்றியைப் பதிவு செய்து அசத்த, 75 கிலோ எடைப்பிரிவில் களமிறங்கிய பவன் நார்வால் தன் பங்கிற்கு ஒரு போட்டியில் வென்று புள்ளிகளைக் கொடுக்க 4-1 என்ற வலிமையான முன்னிலையை பெங்களூரு அணி பெற்றது.
இறுதியாக பஞ்சாப் அணியின் அன்கித், ஹர்ஷ்ப்ரீத் ஆகியோர் வெற்றியைப் பதிவு செய்ய பெங்களூரு அணி 4-3 என்ற புள்ளி கணக்கில் வெற்றிபெற்றது.
இதையும் படிங்க: பெண்கள் தங்களை பாதுகாத்துக் கொள்ள மேரி கோம் அறிவுரை
