சீனாவில் 144 நாடுகள் பங்கேற்ற 7-வது உலக முப்படை ராணுவ வீரர்களுக்கான தடகளப் போட்டிகள் கடந்த அக்.17ஆம் தேதி முதல் 27ஆம் தேதி வரை நடைபெற்றது.
இதில் மாற்றுத் திறனாளிகள் பங்கேற்கும் பாரா பிரிவில் தமிழ்நாட்டை சேர்ந்த ஆனந்தன் பங்கேற்று 100மீ, 200மீ, 400மீட்டர் ஓட்டப் போட்டிகளில் முதலிடம் பிடித்து இந்தியாவிற்காக மூன்று தங்கப் பதக்கங்களை வென்றுள்ளார்.
பதக்கம் வென்ற ஆனந்தன், தனது சொந்த ஊரான கும்பகோணத்துக்கு வந்தபோது அவருக்கு ஊர் பொதுமக்கள் உற்சாக வரவேற்பளித்தனர். அங்குள்ள காந்தி சிலைக்கு ஆனந்தன் மாலை அணிவித்து மரியாதை செலுத்தினார். பின்னர் அவரை கும்பகோணம் உச்சிப்பிள்ளையார் கோயிலில் இருந்து ஊர்வலமாக வாகனத்தில் அழைத்து வந்து, அவர் படித்த பள்ளியில் பாராட்டு விழா நடத்தினர்.
இந்நிகழ்ச்சியில் தமிழ்நாடு தடகள சங்கத்தின் மாநில துணைத்தலைவரும், கும்பகோணம் சட்டமன்ற உறுப்பினருமான க.அன்பழகன், அனைத்து வணிகர் சங்க கூட்டமைப்பின் செயலாளர் சத்தியநாராயணன், முன்னாள் ராணுவத்தினர், நண்பர்கள், பொது மக்கள் என ஏராளமானோர் கலந்துகொண்டு தங்களது வாழ்த்துகளைத் தெரிவித்தனர்.
அதன் பின் செய்தியாளர்களை சந்தித்த ஆனந்தன், சீனாவில் மாற்றுத்திறனாளி ராணுவ வீரர்களுக்கான உலக அளவிலான தடகளப் போட்டி நடைபெற்றது. இதில் 144 நாடுகளிலுள்ள மாற்றுத்திறனாளி ராணுவ வீரர்கள் கலந்துகொண்டனர். இதில் பாரா பிரிவில் 100 மீ, 200 மீ, 400 மீ ஓட்டப்பந்தயத்தில் தங்க பதக்கம் பெற்றுள்ளேன். பாரா பிரிவு ராணுவ வீரர்களுக்கான தடகள போட்டியில் மூன்று தங்கப்பதக்கம் முதன் முறையாக நான் பெற்றுள்ளேன். இதனால் இந்தியாவிற்கு பெருமை சேர்த்துள்ளேன் எனக்கூறினார்.
மேலும் அவர், உலக அளவில் வெற்றி பெற்றாலும், இந்திய பிரதமர், தமிழக முதல்வர் பாராட்டுக்காக காத்திருக்கின்றேன். ஆனால் இதுவரை மத்திய மாநில அரசுகள் கண்டுகொள்ளாதது வருத்தமளிக்கிறது. 2020ஆம் ஆண்டு டோக்கியோவில் நடைபெறும் ஒலிம்பிக் போட்டியில் தங்கம் வெல்வதுதான் என்னுடைய அடுத்த இலக்கு எனத் தெரிவித்தார்.
இதையும் படிங்க: உலகக்கோப்பையில் முதல் ஹாட்ரிக் சாதனை படைத்தது இந்தியர்தான்!
