ஸ்காட்லாந்தில் 2019-20 ஆண்டுக்கான ஸ்காட்டிஷ் ப்ரீமியர் லீக் கால்பந்து போட்டி நடைபெற்றுவருகிறது. இதில், எடின்பர்க் நகரிலுள்ள ஈஸ்டர் ரோட் மைதானத்தில் நடைபெற்ற லீக் போட்டியில் ஹைபெர்னியன் அணி, ரேஞ்சர்ஸ் அணியை எதிர்கொண்டது. ஆட்டம் தொடங்கியதிலிருந்தே சிறப்பாக விளையாடிய ரேஞ்சர்ஸ் அணி 3-0 என்ற கோல் கணக்கில் ஹைபெர்னியன் அணியை வீழ்த்தியது. ரேஞ்சர்ஸ் அணி தரப்பில் வீரர் ரயன் கென்ட் நான்காவது நிமிடத்திலும், ஜோ அரிபோ எட்டாவது நிமிடத்திலும், டொஃபே 53ஆவது நிமிடத்திலும் கோல் அடித்து அசத்தினர்.
இதனிடையே, ஆட்டத்தின் 58ஆவது நிமிடத்தில் பந்தை தடுக்க சென்ற ஹைபெர்னியன் அணியின் டிஃபெண்டர் ரயன் பொர்டியஸ், பந்துக்கு பதிலாக ரேஞ்சர்ஸ் வீரர் பொர்னா பரிசிக்கை தள்ளிவிட்டார். இதனால், நடுவர் ரயன் பொர்டியஸுக்கு ரெட் கார்ட் வழங்க, டக் அவுட்டில் போட்டியைப் பார்த்துக்கொண்டிருந்த இரு அணியின் பயிற்சியாளர்களும் வாக்குவாதத்தில் ஈடுபட்டதால் பரபரப்பு ஏற்பட்டது.
இதன் விளைவாக, ரேஞ்சர்ஸ் அணியின் பயிற்சியாளர் டாம் குல்ஷா ஹைபெர்னியன் அணியின் துணை பயிற்சியாளர் ஜான் போட்டர் ஆகியோருக்கும் நடுவர் ரெட் கார்ட் தந்து ஆட்டத்திலிருந்து வெளியேற்றினார். இப்போட்டியில் பதிவான கோல்களை விட ஒரு ரெட் கார்டுக்காக இரு அணி பயிற்சியாளர்களும் வாக்குவாதத்தில் ஈடுபட்ட வீடியோ இணையதளத்தில் வைரலானது. ஒட்டுமொத்ததில் ரேஞ்சர்ஸ் அணிக்கு இப்போட்டியில் கிடைத்த வெற்றியின் மூலம், புள்ளிப்பட்டியலில் 44 புள்ளிகளுடன் இரண்டாவது இடத்தில் உள்ளது.
இதையும் படிங்க: பந்துக்கு பதில் வீரரின் நெஞ்சை எட்டி உதைத்த கோல்கீப்பர்!
