ஐதராபாத் : கிரிக்கெட்டின் ஆரம்ப காலத்தில் இருந்து இப்போது வரை சுழற்பந்து வீச்சாளர்களுக்கு பஞ்சம் இல்லாதா அணி என்றால் தான் அது இந்திய அணி மட்டும் தான். கிட்டத்தட்ட 1970 ஆம் ஆண்டுகளில் இருந்து தற்போது வரை உலகத்தரம் வாய்ந்த சுழற்பந்து வீச்சாளர்களை உலக அரங்கிற்கு இந்திய கிரிக்கெட் அணி தொடர்ந்து வழங்கி கொண்டு தான் இருக்கிறது.
ஏரபள்ளி பிரசன்னா, பிசன் சிங் பேடி, அனில் கும்பளே, ஹர்பஜன் சிங் இப்படி அன்று முதல் இன்று வரை தலை சிறந்த சுழற்பந்து வீச்சாளர்களை இந்திய கிரிக்கெட் அணி தொடர்ந்து வழங்கி கொண்டே தான் வருகிறது. அப்படி இந்த சுழற்பந்து வீச்சாளர்களின் வரிசையில் நாம் பார்க்க இருப்பது இன்று தனது 37வது பிறந்த நாளை கொண்டாடும் ரவிச்சந்திரன் அஸ்வின் தான். அவரை பற்றியது தான் இந்த சிறப்பு தொகுப்பு...
1986ஆம் ஆண்டு செப்டம்பர் 17ஆம் தேதி தமிழ்நாட்டின் சென்னையில் பிறந்தவர் ஆர்.அஷ்வின். இவரின் தந்தை பெயர் ரவிச்சந்திரன். இவர் கிளப் லெவல் கிரிக்கெட்டில் வேகப்பந்து வீச்சாளராக விளையாடியவர். சிறு வயதில் இருந்தே கிரிக்கெட்டின் மீது ஆர்வம் கொண்ட அஸ்வின், தனது 9 வயதிலேயே கிரிக்கெட் பயணத்தை தொடங்கிவிட்டார்.
இவர் ஒரு பேட்ஸ்மேனாக தான் விளையாட ஆரம்பித்தார். பின்பு சில பல காரணங்களால் சுழற்பந்து வீச்சாளராக அவதாரம் எடுக்கும், சூழலுக்கு தள்ளப்பட்டார். கடந்த 2010ஆம் ஆண்டு ஜூன் 5ஆம் தேதி இலங்கை அணிக்கு எதிரான ஒருநாள் கிரிக்கெட் போட்டியில் இந்திய அணிக்காக சர்வதேச கிரிக்கெட்டில் அடியெடுத்து வைத்தார்.
அதன்பின், அபார பந்துவீச்சு திறனால் இந்திய அணியில் தன்னை நிலைநிறுத்திக் கொண்டார். குறிப்பாக டெஸ்ட் கிரிக்கெட்டில் முக்கிய பங்கு வகித்து வருகிறார். டெஸ்ட் கிரிக்கெட்டில் தொடர்ந்து அசத்தி வரும் அஸ்வின், அதிவேகமாக 50 விக்கெட், 100, 150, 200 விக்கெட்டுகள், 250, 300, 350 விக்கெட்டுகள், 400, 450 விக்கெட்டுகளை விழ்த்திய வீரர் என்ற பெருமையை தன்னகத்தே வைத்து உள்ளார்.
இதுவரை அவர் டெஸ்ட் கிரிக்கெட்டில் விளையாடிய 93 போட்டிகளில் 486 விக்கெட்களை எடுத்துள்ளார். இதன் மூலம் டெஸ்ட்டில் அதிக விக்கெட்களை எடுத்த 2வது வீரர் என்ற பெருமையும் உலக அளவில் 9வது இடத்திலும் உள்ளார். உலக அளவில் இவருக்கு முன்னதாக முத்தையா முரளிதரன், ஷேன் வார்னே, ஜேம்ஸ் ஆண்டர்சன், அணில் கும்பிளே, ஸ்டூவர்ட் பிராட், கிளென் மெஹ்ரத், வால்ஷ், நாதன் லையன் ஆகியோர் உள்ளனர்.
மேலும், டெஸ்ட் கிரிக்கெட்டில் மொத்தம் பத்து முறை மேன் ஆப் தி சீரியஸ் விருதை பெற்றுள்ளார். இதற்கு முன் முத்தையா முரளிதரன் 11 விருதுகளுடன் முதல் இடத்தில் உள்ளார். சர்வதேச கிரிக்கெட்டை பொறுத்தவரை டெஸ்ட்டில் 486 விக்கெட்களும், 113 ஒருநாள் போட்டிகளில் விளையாடி 151 விக்கெட்களும், 65 டி20 கிடிக்கெட் போட்டிகளில் 72 விக்கெட்களும் வீழ்த்தி உள்ளார்.
அஸ்வின் பந்து வீச்சு மட்டுமல்லாமல் பேட்டிங்கிலும் சிறந்து விளங்கி உள்ளார். பல்வேறு இக்கட்டான சூழ்நிலைகளில் இந்திய அணிக்கு வெற்றியை தேடித் தரும் கீ பிளேயர்களில் ஒருவராக அஸ்வின் காணப்படுகிறார். இதுவரை அவர் டெஸ்ட் கிடிக்கெட்டில் மட்டும் 5 சதங்கள், 13 அரை சதங்கள் விளாசி உள்ளார். அதிகபட்சமாக 124 ரன்கள் அடித்து உள்ளார்.
அவர் சர்வதேச டெஸ்ட் கிரிக்கெட்டில் 34 முறை 5 விக்கெட்களையும், 8 முறை 10 விக்கெட்களையும் வீழ்த்தி உள்ளார். அவரது பந்து வீச்சின் சராசரி 23 புள்ளி 61 ஆக உள்ளது. இவர் தற்போது டெஸ்ட் கிரிக்கெட்டில் நம்பர் 1 பந்து வீச்சாளராக திகழ்கிறார். இப்படி இத்தனை சாதனைகளை படைத்த இவர் வரும் கால இளைஞர்களையும் வழிநடத்தி வருகிறார். இவர் யூடியூப் சேனல் ஒன்றை தொடங்கி அதில் கிரிக்கெட்டை பற்றிய தகவல்களை பகிர்ந்து வருகிறார். இன்று பிறந்தநாள் கொண்டாடும் சுழல் மன்னன் ரவிச்சந்திரன் அஸ்வினுக்கு ஈடிவி பாரத் சார்பாக பிறந்தநாள் வாழ்த்துக்கள்.
இதையும் படிங்க : Neeraj Chopra : டைமண்ட் லீக் ஈட்டி எறிதல்... வெள்ளி வென்று நீரஜ் சோப்ரா அசத்தல்!
