அசாம்: இலங்கை அணி இந்தியாவில் சுற்றுப்பயணம் மேற்கொண்டு தலா 3 டி20 மற்றும் ஒருநாள் கிரிக்கெட் தொடரில் விளையாடி வருகிறது. இரு அணிகளுக்கு இடையிலான டி20 கிரிக்கெட் தொடர் நிறைவுபெற்ற நிலையில், அதில் 2-க்கு 1 என்ற கணக்கில் இந்திய அணி வெற்றிபெற்றது.
ஒருநாள் கிரிக்கெட் தொடர் தொடங்கிய நிலையில், இந்தியா - இலங்கை அணிகளுக்கு இடையிலான முதலாவது 50 ஓவர் போட்டி அசாம் மாநிலம் கவுகாத்தியில் இன்று (ஜன.10) நடந்தது. டாஸ் வென்ற இலங்கை அணி பந்துவீச்சை தேர்வு செய்தது. இந்திய அணியில் கேப்டன் ரோகித் சர்மா மற்றும் சுப்மான் கில் இன்னிங்ஸை தொடங்கினர்.
ஆரம்பம் முதலே நேர்த்தியான ஆட்டத்தை வெளிப்படுத்திய இருவரும், ஏதுவான பந்துகளை எல்லைக் கோட்டிற்கு அனுப்பி துரித ரன் சேகரிப்பில் ஈடுபட்டனர்.19.4-வது ஓவரில் இந்த ஜோடி பிரிந்தது. சுப்மான் கில் 70 ரன்கள் குவித்து எல்.பி.டபிள்யூ ஆகி அவுட்டானார்.
தொடர்ந்து களமிறங்கிய கோலி, இலங்கை பந்துவீச்சை சிதறிடித்து ரன்களைக் குவித்தார். ஒருபுறம் கோலி அதிரடியாக ஆடிய நிலையில், மறுபுறம் சீரான இடைவெளியில் விக்கெட்டுகள் விழுந்த வண்ணம் இருந்தன. இலங்கை பந்து வீச்சை நொறுக்கி எடுத்த கோலி, வெற்றிகரமாக தனது 45ஆவது சதத்தைப் பூர்த்தி செய்தார். உள்நாட்டில் அதிக சதங்கள் அடித்த ஜாம்பவான் சச்சின் டெண்டுல்கரின் சாதனையை கோலி, சமன் செய்தார்.
இந்திய அணி 50 ஓவர்கள் முடிவில் 7 விக்கெட் இழப்புக்கு 373 ரன்கள் குவித்தது. இமாலய இலக்கை நோக்கி களமிறங்கிய இலங்கை அணியில் தொடக்க வீரரை தவிர, மற்ற வீரர்கள் வருவதும் போவதுமாக அணிவகுப்பு நடத்தினர். 161 ரன்களுக்கு இலங்கை அணி 5 விக்கெட்டுகளை இழந்து தவித்தது.
மறுபுறம் கேப்டன் தசுன் ஷனகா மட்டும் அணியின் வெற்றிக்காகப் போராடினார். இந்திய பந்துவீச்சாளர்களுக்கு நெருக்கடி கொடுத்த சனகா சதம் அடித்து, அணியின் ஸ்கோரை உயர்த்தினார். மறுபுறம் விக்கெட்டுகள் வீழ்ந்த வண்ணம் இருந்த நிலையில், 50 ஓவர்கள் முடிவில் இலங்கை அணி 8 விக்கெட்டுகளை இழந்து 306 ரன்கள் மட்டுமே சேர்த்தது.
இதன்மூலம் இந்திய அணி 67 ரன்கள் வித்தியாசத்தில் அபார வெற்றி பெற்றது. 3 போட்டிகள் கொண்ட ஒருநாள் தொடரை 1-க்கு 0 என்ற கணக்கில் இந்திய அணி முன்னிலை பெற்றது. இவ்விரு அணிகளுக்கு இடையிலான 2-வது ஒருநாள் கிரிக்கெட் போட்டி ஜனவரி 12ஆம் தேதி கொல்கத்தாவில் நடைபெறுகிறது.
இதையும் படிங்க: "எனது கேப்டன்சியில் மாற்றத்தை கொண்டு வந்தவர் ஆஷிஷ் நெஹ்ரா" - ஹர்திக் பாண்டியா நெகிழ்ச்சி...
