இந்தியா - ஆஸ்திரேலியா அணிகளுக்கு இடையிலான இரண்டாவது ஒருநாள் போட்டி ராஜ்கோட்டில் நடைபெற்றுவருகிறது. அதில் இந்திய அணியின் தொடக்க வீரர் ரோஹித் சர்மா 44 பந்துகளில் 42 ரன்களை எடுத்தார். இதன்மூலம் தொடக்க வீரராகக் களமிறங்கி குறைந்த போட்டிகளில் 7 ஆயிரம் ரன்கள் எடுத்த வீரர் என்ற ஆம்லாவின் சாதனையை முறியடித்தார்.
ஆம்லா தொடக்க வீரராக 7 ஆயிரம் ரன்களை 147 இன்னிங்ஸ்களில் எடுத்திருந்ததை, ரோஹித் 137 இன்னிங்ஸ்களிலேயே எடுத்துள்ளார்.
இதன்மூலம் தொடக்க வீரராக 7 ஆயிரம் ரன்களைக் கடந்த நான்காவது இந்திய வீரர் என்ற பெருமையையும் பெற்றுள்ளார். இவருக்கு முன்னதாக சச்சின் டெண்டுல்கர், கங்குலி, சேவாக் ஆகியோர் தொடக்க வீரர்களாக 7 ஆயிரம் ரன்களைக் கடந்துள்ளனர்.
மேலும் ரோஹித் சர்மா சர்வதேச ஒருநாள் போட்டிகளில் 9 ஆயிரம் ரன்களை எட்டுவதற்கு இன்னும் 4 ரன்கள் மட்டுமே எடுக்கவேண்டியுள்ளது. இந்த சாதனையை அவர் அடுத்த போட்டியில் படைப்பார் என எதிர்பார்க்கப்படுகிறது.
இதையும் படிங்க: ஒரே இன்னிங்ஸில் தவிர்க்க முடியாத வீரராக மாறிய ராகுல்
