2023ஆம் ஆண்டு நடைபெறவுள்ள ஐசிசி டெஸ்ட் சாம்பியன்ஷிப் தொடரிலிருந்து ஐந்து நாள்களாக நடைபெறும் டெஸ்ட் போட்டியை நான்கு நாள்களாக நடத்துவது குறித்து ஐசிசி சமீபத்தில் ஆலோசனை நடத்தியது. இந்த யோசனைக்கு முன்னாள் வீரர்கள் பலரும் எதிர்ப்பு தெரிவித்துள்ளனர். இந்திய பந்துவீச்சாளர்கள் இதுவரை இதுகுறித்து பதில் கூறாத நிலையில், ட்விட்டரில் அஸ்வின் பதிலளித்துள்ளார்.
அவரது ட்விட்டர் பக்கத்தில் தென் ஆப்பிரிக்கா - இங்கிலாந்து அணிகள் ஆடிய போட்டியைப் பற்றி, ''தென் ஆப்பிரிக்கா 4 விக்கெட்டுகளை இழந்துள்ளது. இந்தப் போட்டி மிகச்சிறந்த முடிவினை எட்டப்போகிறது'' எனப் பதிவிட்டார். அதற்கு ரசிகர் ஒருவர் நான்கு நாள் டெஸ்ட் போட்டி குறித்து கருத்து கேட்க, தனது சோகத்தை ஸ்மைலி வாயிலாகப் பதிவிட்டார்.
டெஸ்ட் போட்டிகள் நான்கு நாள்களாக குறைந்தால் அதில் பெரும் பாதிப்பை சந்திப்பவர்கள் முதலில் சுழற்பந்துவீச்சாளர்கள்தான். அதனை மனதில் வைத்தே சுழற்பந்துவீச்சாளர்கள் பலரும் இந்த யோசனைக்கு எதிர்ப்பு தெரிவித்து வருகின்றனர்.
முக்கியமாக டெஸ்ட் போட்டிகளின் நாள்களை நான்கு நாள்களாக குறைக்கும் யோசனைக்கு பலரும் எதிர்ப்பு தெரிவித்துவரும் நிலையில், தென் ஆப்பிரிக்கா - இங்கிலாந்து அணிகளுக்கு இடையிலான போட்டி ஐந்தாவது நாளை எட்டப்பட்டுள்ளது குறிப்பிடத்தக்கது.
இதையும் படிங்க: சிக்சர் அடித்த முடித்துவைத்த கோலி - 2020ஐ வெற்றியுடன் தொடங்கிய இந்தியா!
