ஆஸ்திரேலிய அணியின் முன்னாள் கேப்டனும், நட்சத்திர வீரருமாக வலம் வருபவர் ஸ்டீவ் ஸ்மித். இவர் தனது ரசிகர்களுடன் இன்ஸ்டாகிராம் நேரலையில் உரையாடினார். அப்போது ரசிகர்கள் கேட்கும் அனைத்து கேள்விகளுக்கும் பதிலளித்த ஸ்மித், தன்னை மிகவும் கவர்ந்த இந்திய வீரராக கே எல் ராகுலையும் தேர்வு செய்துள்ளார்.
இதுகுறித்து பேசிய ஸ்மித், "கே.எல்.ராகுல் மிகச்சிறந்த வீரர். தன்னை கவர்ந்த இந்திய வீரரும் அவர்தான். அதேசமயம் இந்தியாவின் மிகச்சிறந்த ஃபீல்டராக நான் ஜடேஜாவை பரிந்துரைப்பேன். ஏனெனில் அவரது திறன் மற்ற வீரர்களை காட்டிலும் மேலானது.
இந்திய அணியின் முன்னாள் கேப்டன் மகேந்திர சிங் தோனி ஒரு ஜாம்பவான் விரராவர். அவர் இந்திய அணிக்காக இதுநாள் வரை செய்துள்ள சாதனைகள் எண்ணிலடங்காதவை. அதேசமயம் ஐ.பி.எல். தொடரை எனக்கு மிகவும் பிடித்த ஒன்றாக கருதுவேன். ஏனெனில் அத்தொடரில் உலகெங்கிலும் உள்ள சிறந்த வீரர்களுடனும், அவர்களுக்கு எதிராகவும் என்னால் விளையாடமுடியும்.
பார்டர் - கவாஸ்கர் கோப்பை தொடரில் இந்திய அணி விளையாட ஒப்புதல் தெரிவித்ததால், அத்தொடரில் விளையாடுவதற்கு ஆவலுடன் இருக்கிறேன்" என்று தெரிவித்துள்ளார்.
