இந்திய அணியில் தற்போது கோலி, ரோஹித் சர்மா, தோனி இருந்தாலும், ரெய்னா இல்லையே என்ற வருத்தம் பெரும்பாலான இந்திய ரசிகர்களுக்கு இல்லாமல் இருக்காது. அந்த அளவிற்கு ரெய்னாவை மிஸ் செய்யும் ரசிகர்கள் இங்கு அதிகம். அவரது பிறந்தநாளான இன்று மீண்டு(ம்) வா சின்ன தல...என சமூகவலைதளங்களில் ரெய்னாவின் மறக்க முடியாத நினைவுகளை அவரது ரசிகர்கள் பகிர்ந்துகொண்டுவருகின்றனர். சக வீரர்களும் அவருக்கு பிறந்தநாள் வாழ்த்துத் தெரிவித்துவருகின்றனர்.
இந்திய அணியில் இடதுகை பேட்ஸ்மேனாக நுழைந்த இவர், ஆரம்பக் காலக்கட்டத்தில் டாப் ஆர்டர் பேட்ஸ்மேனாகவும் பின் நாட்களில் ஆல்ரவுண்டராகவும் விளங்கினார். ரெய்னா இந்திய அணிக்காக ஏதேனும் ஒரு விதத்தில் தனது பங்களிப்பை வெளிப்படுத்துவார். பேட்டிங்கில் சொதப்பினால், பவுலிங்கில்... அதுவும் இல்லை என்றால் நிச்சயம் ஃபீல்டிங்கில் குறைந்தது 30 ரன்களையாவது தடுத்து நிறுத்துவார். அதுவும் குறிப்பிட்ட இடத்தில்தான் அவர் ஃபீல்டிங் செய்வார் என்று இல்லை, எந்த இடத்தில் இருந்தாலும் அவர் நன்கு ஃபீல்டிங் செய்யக் கூடியவர்.
அதிலும், டைவ் அடித்து கேட்ச் பிடிப்பது, அசால்ட்டாக ரன் அவுட் செய்வதெல்லாமே ரெய்னாவுக்கு கை வந்த கலை. மேற்கூறியதைப் போலவே, ஆரம்பக் காலக்கட்டத்தில் ஒருநாள் போட்டிகளில் டாப் ஆர்டர் பேட்ஸ்மேனாக இருந்த அவர், பின்நாட்களில் அணியின் தேவைக்காக லோயர் டவுன் வரிசையில் களமிறங்கி ஹிட்டராக மாறினார். ஆஃப் சைடில் அவர் அடிக்கும் சிக்சர்கள் எல்லாம் ரெய்னா ஃபேன்களின் ஆல் டைம் ஃபெவரைட் ஷாட்ஸ்.
அணியின் தேவைக்காக ஹிட்டராக மாறிய ரெய்னா அதிலும் தனது பங்களிப்பைத் தொடர்ந்து வெளிப்படுத்தி வந்தார். 2011 உலகக்கோப்பையில், ஆஸ்திரேலியா, பாகிஸ்தான் அணிகளுக்கு எதிரான அவரது ஆட்டம் அதற்கு சிறந்த எடுத்தக்காட்டு. ஒருநாள் போட்டிகளில் தனது டாப்-ஆர்டர் இடத்தை விட்டாலும், ரெய்னா டி20 ஸ்பெஷலிஸ்ட்டாகவே கருத்தப்பட்டார். சிஎஸ்கே அணிக்காக மூன்றாவது வரிசையில் களமிறங்கி பல ரன்களை அடித்த அவர், இந்திய அணிக்கான போட்டிகளிலும் மூன்றாவது வரிசையில் களமிறங்கி அதிரடி காட்டினார். சில தொடர்களில் தோனி ஓய்வு பெறும்போதெல்லாம் இவர் கேப்டனாகவும் இருந்து அணியை சிறப்பாக வழிநடத்தியுள்ளார்.
ஆனால், கோலியின் வளர்ச்சிக்குப் பிறகு ரெய்னா டி20 போட்டிகளில் தனது மூன்றாவது இடத்தை கோலிக்கு விட்டுகொடுத்து நான்காவது இடத்துக்கு மாறினார். அதன்பிறகும், நான்காவது வரிசையில் அவர் தனது சிறந்த ஆட்டத்தை வெளிப்படுத்தி தனக்கான இடத்தை பிடித்துகொண்டார். 2015 உலகக்கோப்பைக்குப் பிறகு, தென் ஆப்பிரிக்காவுக்கு எதிரான தொடர்தான் அவருக்கு முற்றிலும் எமனாக மாறியது.
அந்தத் தொடரில் ரெய்னா அவுட் ஆஃப் ஃபார்மில் இருந்ததால், அவர் ஒருநாள் போட்டி அணியிலிருந்து ஓரங்கட்டப்பட்டார். கே.எல். ராகுல் வருகைக்குப் பிறகு டி20யில் ரெய்னாவின் நான்காவது வரிசையில் கே. எல். ராகுல் களமிறங்க ரெய்னா லோயர் டவுன் வரிசையில் களமிறங்கினார். இதனால், அதிரடியாக ஆட வேண்டும் என்ற மனநிலையில் தனது ஃபார்மை இழந்தார்.
அதற்குச் சிறந்த எடுத்துக்காட்டு கடந்த ஆண்டு இங்கிலாந்துக்கு எதிரான டி20 தொடர்தான். அந்தத் தொடரில் ஐந்தாவது வரிசையில் களமிறங்கிய ரெய்னா 28 ரன்களை மட்டுமே எடுத்தார். இதனால், அவுட் ஆஃப் ஃபார்ம் காரணமாக அணியிலிருந்து முழுவதுமாக ஓரங்கட்டப்பட்ட அவர் இனி எப்போது கம்பேக் தருவார் என்ற எதிர்பார்ப்பு அவரது ரசிகர்களுக்கு இருக்கிறது.
ரெய்னா என்னதான் அவுட் ஆஃப் ஃபார்மில் இருக்கிறார் என்றுச் சொன்னாலும், அவர் தோனியுடன் விளையாடினால் ஃபார்முக்கு வருவார். ஏனெனில் பேட்டிங்கில் தோனியுடனான ஃபார்ட்னர்ஷிப்பில் அவர் சொதப்பியது இல்லை. தோனி - ரெய்னா ஜோடி இந்திய அணிக்காக கடைசி 10 முதல் 15 ஓவர்களில் அதிகமான ரன்களை சேர்த்துள்ளது. தோனி எப்போதும் பேட்டிங்கில் ஃலெப்ட் - ரைட் காம்பினேஷனை அதிகம் விரும்பக்கூடியவர்.
ஒவ்வொரு முறை இவர்கள் ஜோடி சேரும்போது அது இந்திய அணிக்கும் சரி, சிஎஸ்கேவும் சரி நல்ல பார்ட்னர்ஷிப்பாகவே இருக்கும். ரெய்னா இனி இந்திய அணியில் கம்பேக் கொடுப்பாரா என்பது தெரியாது. ஆனால் அவர் மற்ற வீரர்களான சேவாக், கம்பீர், யுவராஜ் போன்று அணியில் கம்பேக் தராமலேயே ஓய்வு பெறக்கூடாது என்பதுதான் அவரது ரசிகர்களின் விருப்பம். பிறந்தநாள் வாழ்த்துகள் சின்ன தல... மீண்டு(ம்) திரும்பி வா சின்ன தல..!
