இந்தியாவில் சுற்றுப்பயணம் மேற்கொண்டுள்ள இலங்கை அணி மூன்று டி20 போட்டிகள் கொண்ட தொடரில் விளையாடிவருகிறது. இதில், இவ்விரு அணிகளுக்கு இடையே கவுகாத்தியில் நடைபெறவிருந்த முதல் டி20 போட்டி மழையால் கைவிடப்பட்ட நிலையில், இன்று இரண்டாவது டி20 போட்டி இந்தூர் மைதானத்தில் நடைபெறவுள்ளது. இரண்டு ஆண்டுகளுக்கு முன் இதே மைதானத்தில் நடைபெற்ற போட்டி குறித்து சிறு பார்வை.
ரோஹித்தின் அதிரடி சதம்
இரண்டு ஆண்டுகளுக்கு முன் இதே இந்தூர் மைதானத்தில் இலங்கை அணிக்கு எதிராக நடைபெற்ற டி20 போட்டியில் ரோஹித் சர்மா தனது அதிரடியான ஆட்டத்தை வெளிப்படுத்தியது ரசிகர்களால் மறக்க முடியாது. டாஸ் வென்ற இலங்கை அணி முதலில் இந்திய அணியை பேட்டிங் செய்ய பணித்தது.
கோலிக்கு ஓய்வு வழங்கப்பட்ட நிலையில் கேப்டன் பொறுப்பை ஏற்றுகொண்ட ரோஹித் சர்மா தனது அசுரத்தனமான பேட்டிங்கை வெளிப்படுத்தி 35 பந்துகளில் சதம் விளாசினார். இதன்மூலம், டி20 போட்டிகளில் வேகமாக சதம் அடித்த தென் ஆப்பிரிக்காவின் டேவிட் மில்லரின் சாதனையை சமன்செய்தார்.
தொடர்ந்து அதிரடியாக விளையாடிய அவர் 43 பந்துகள் 12 பவுண்டரிகள், 10 சிக்சர்கள் என 118 ரன்களில் வெளியேறினார். மறுமுனையில், கே.எல். ராகுல் 49 பந்துகளில் ஐந்து பவுண்டரிகள், எட்டு சிக்சர்கள் என 89 ரன்களில் ஆட்டமிழந்தார். இலங்கை அணியின் பந்துவீச்சை துவம்சம் செய்த இந்திய அணி 20 ஓவர்களில் ஐந்து 260 ரன்களைக் குவித்தது. டி20 போட்டிகளில் இந்திய அணி அடித்த அதிகபட்ச ஸ்கோர் இதுவாகும்.
இதைத்தொடர்ந்து, களமிறங்கிய இலங்கை அணி 17.2 ஓவர்களில் 172 ரன்களுக்கு ஆல் அவுட்டானதால் இந்திய அணி 88 ரன்கள் வித்தியாசத்தில் அபார வெற்றிபெற்றது.
மீண்டும் பழைய மேஜிக்கை நிகழ்த்துமா?
தற்போது இரண்டு ஆண்டுகளுக்கு பின் ரோஹித் இல்லாமல் களமிறங்கும் இந்திய அணி கடந்தமுறை போலவே இம்முறையும் அதிரடியான ஆட்டத்தை கடைப்பிடிக்குமா என்ற எதிர்பார்ப்பு ரசிகர்கள் மத்தியில் எழுந்துள்ளது. கடந்தமுறை ரோஹித் சர்மா ஆடிய இன்னிங்ஸை இம்முறை கோலி அல்லது ஷிகர் தவான் விளையாடி மீண்டும் அதிகபட்ச ஸ்கோரை அடிப்பார்களா என்பதைப் பொறுத்திருந்துதான் பார்க்க வேண்டும்.
இந்திய அணியில் நீண்ட நாள்களுக்குப் பிறகு களமிறங்கவுள்ள பும்ரா, தவான் ஆகியோரது ஆட்டத்தின் மீதான எதிர்பார்ப்பு ரசிகர்களிடையே பன்மடங்கு அதிகரித்துள்ளது. இதுவரை இவ்விரு அணிகள் நேருக்கு நேர் மோதிய 17 டி20 போட்டிகளில் இந்திய அணி 11 போட்டிகளிலும் இலங்கை அணி ஐந்து போட்டிகளிலும் வெற்றிபெற்றுள்ளது.
இந்தியா - இலங்கை அணிகளுக்கு இடையிலான இரண்டாவது டி20 போட்டி இன்று இரவு ஏழு மணிக்கு ஸ்டார் ஸ்போர்ட்ஸ் சேனலில் ஒளிபரப்பாகிறது. இதனிடையே இந்தூர் மைதானத்தில் இன்று கடும் வெயில் அடிப்பதால் மழைபெய்ய வாய்ப்பில்லை எனக் கூறப்பட்டுள்ளது.
கடந்தமுறை இப்போட்டியில் விளையாடிய இந்திய வீரர்களான ரோஹித் சர்மா, தோனி, ஹர்திக் பாண்டியா, தினேஷ் கார்த்திக், ஜெய்தேவ் உனாத்கட் ஆகியோர் தற்போதைய இந்திய அணிக்குழுவில் இடம்பெறவில்லை என்பது கவனிக்கத்தக்கது.
இதையும் படிங்க: 6 பந்துகளில் 5 சிக்சர்: பிக் பாஷில் பறக்கவிட்ட கொல்கத்தாவின் புதிய வரவு
