அகமதாபாத்தின் மொடீராவில் 110,000 பேர் அமர்ந்து பார்க்கும் அளவிற்கு உலகின் மிகப்பெரிய மைதானம் கட்டப்பட்டு வருகிறது. இந்த மைதானத்தின் கட்டுமானப் பணிகள் இன்னும் சில மாதங்களில் முடிவடைய உள்ள நிலையில், ஐபிஎல் தொடருக்கான இறுதிப்போட்டி அம்மைதானத்தில் நடக்கும் என தகவல் வெளியாகியுள்ளது.
இன்று ஐபிஎல் நிர்வாகக்குழு கூட்டம் டெல்லியில் கூடியது. அதில் ஐபிஎல் தொடருக்கான இறுதிக்கட்ட ஆலோசனைகள் மேற்கொள்ளப்பட்டதாக தெரிகிறது. இதனால் இன்னும் சில நாள்களில் ஐபிஎல் தொடருக்கான அட்டவணை வெளியாக வாய்ப்புள்ளதாக அறியமுடிகிறது.
இதனிடையே அகமதாபாத் மைதானத்தில் ஐபிஎல் இறுதிப் போட்டி நடத்துவதற்கான இறுதி முடிவு அடுத்த மாதம் தான் எடுக்கமுடியும் எனத் தெரிவிக்கப்பட்டுள்ளது.
முன்னதாக இந்த மைதானத்தில் ஆசிய லெவன் அணிக்கு எதிராக உலக லெவன் அணி மோதும் போட்டி நடக்கவுள்ளதாகத் தெரிவிக்கப்பட்டது. ஆனால் அந்தப் போட்டி நடக்கவுள்ள நேரத்தில் மைதானத்திற்கான கட்டுமானப் பணிகள் முடிவடையாது என்பதால், ஐபிஎல் இறுதிப் போட்டியை நடத்த மைதான நிர்வாகிகள் முனைப்பு காட்டுகின்றனர்.
மேலும் ஐபிஎல் தொடரின் இறுதிப் போட்டி மும்பை வான்கடே மைதானத்தில் தான் விதிகளின்படி நடக்கவேண்டும் என்பது குறிப்பிடத்தக்கது.
இதையும் படிங்க: ஐபிஎல் நிர்வாகக் குழுக் கூட்டத்தில் கங்குலி, டிராவிட்!
