சென்னை: ஆனந்த் சங்கர் எழுதி இயக்க, மினி ஸ்டுடியோஸ் சார்பாக வினோத் குமார் தயாரிக்கும் படம் 'எனிமி'. இந்தத் திரைப்படத்தில் ஆர்யாவும், விஷாலும் நாயகர்களாக நடித்துள்ளனர். இவர்களுடன் நடிகை மிருணாளினி ரவி, மம்தா மோகன்தாஸ், நடிகர் பிரகாஷ்ராஜ் உள்ளிட்ட பலர் நடித்துள்ளனர்.
ஆக்ஷன் த்ரில்லராக உருவாகியுள்ள 'எனிமி' படத்திற்கு, சாம் சி.எஸ். பின்னணி இசை அமைத்துள்ளார். இவரது இசையில் சமீபத்தில் வெளியான எனிமி பட டீசர், ரசிகர்கள் மத்தியில் பெரும் வரவேற்பைப் பெற்றது. இதனையடுத்து இந்தத் திரைப்படம் எப்போது வெளியாகும் என ரசிகர்கள் ஆவலுடன் கேள்வி எழுப்பிவந்தனர்.
இந்நிலையில் ஆயுதபூஜையையொட்டி, வருகின்ற அக்டோபர் 13ஆம் தேதி 'எனிமி' திரைப்படம், திரையரங்குகளில் வெளியிட படக்குழுவினர் முடிவெடுத்துள்ளதாக தகவல் வெளியாகியுள்ளது. விரைவில் இது குறித்த அதிகாரப்பூர்வ அறிவிப்பு வெளியாக உள்ளது.
இதையும் படிங்க: பிக்பாஸ் வின்னர் உயிரிழப்பு- பிரபலங்கள் இரங்கல்
