நடிகர் விஜய் நடிக்கும் 63ஆவது படத்தை இயக்குநர் அட்லி இயக்கிவருகிறார். இந்தப்படத்தில் விஜய்க்கு ஜோடியாக நயன்தாரா நடிக்கிறார். இந்தப் படத்தில் ஜாக்கி ஷெராஃப், யோகிபாபு, கதிர், விவேக், டேனியல் பாலாஜி, ஆனந்த்ராஜ், உள்ளிட்ட பலர் நடித்துவருகின்றனர்.
இதில் கால்பந்து விளையாட்டு பயிற்சியாளராக விஜய் நடித்துவருகிறார். இந்தப் படத்தின் படப்பிடிப்பு பூந்தமல்லியில் உள்ள ஈ.வி.பி. ஃபிலிம் சிட்டியில் நடந்துவருகிறது.
இதற்காக பிரமாண்ட செட் அமைக்கப்பட்டு படப்பிடிப்பு நடைபெற்றுவருகிறது. இந்நிலையில் நேற்று இரவு 100 அடி உயரத்தில் கிரேனில் கட்டப்பட்டிருந்த ஃபோக்கஸ் லைட் எதிர்பாராத விதமாக எலக்ட்ரீசியன் தலை மேல் விழுந்ததில் அவருக்கு பலத்த காயம் ஏற்பட்டது.
இதையடுத்து, அவர் தனியார் மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டுவருகிறது. விஜய் 63 படப்பிடிப்பில் விபத்து ஏற்பட்ட சம்பவம் விஜய் ரசிகர்கள் மத்தியில் அதிர்ச்சியை ஏற்படுத்தி உள்ளது.
ஏற்கனவே, இந்தப் படத்தில் நடித்த துணை நடிகை ஒருவர் அட்லி தன்னை தாக்கியதாக காவல் ஆணையாரிடம் புகார் அளித்திருந்தது குறிப்பிடத்தக்கது.
