தமிழில் வெளியான 'படைவீரன்' படத்தின் மூலம் இயக்குநராக அறிமுகமானவர் தனா. இவர் இயக்குநர் மணிரத்னத்திடம் உதவி இயக்குநராக பணிபுரிந்தவர். இவர் தற்போது 'வானம் கொட்டட்டும்' திரைப்படத்தை இயக்கி வருகிறார். இப்படத்தில் விக்ரம் பிரபு நாயகனாக நடிக்கிறார்.
மடோனா செபாஸ்டியன், சரத்குமார், ராதிகா, ஐஸ்வர்யா ராஜேஷ் உள்ளிட்டோரும் முக்கிய கதாபாத்திரங்களில் நடிக்கின்றனர். இயக்குநர் மணிரத்னம் தனது மெட்ராஸ் டாக்கீஸ் நிறுவனத்தின் மூலம் இதனை தயாரித்துள்ளார். இப்படத்தின் மூலம் பாடகர் சித்ஸ்ரீராம் இசையமைப்பாளராக அறிமுகமாகிறார். ப்ரீதா ஜெயராமன் ஒளிப்பதிவு செய்கிறார். சமீபத்தில் வெளியான இப்படத்தின் ஃபர்ஸ்ட் லுக், ஃபர்ஸ்ட் சிங்கிள், டீஸர் ஆகியவை ரசிகர்கள் மத்தியில் நல்ல வரவேற்பை பெற்றது. பிப்ரவரி 7ஆம் தேதி இப்படம் திரைக்கு வர உள்ளது.
இதனையடுத்து சென்னை தனியார் கல்லூரியில் நடைபெற்ற கல்ச்சுரல்ஸ் விழாவில் வானம் கொட்டட்டும் நடிகர் விக்ரம் பிரபு, படக்குழுவினர் கலந்து கொண்டனர். அப்போது அங்கு படத்தின் டீஸர் புதிய பாட்டின் லிரிக்கல் வீடியோ ஆகியவை வெளியிட்டனர்.
இதன் பின் விக்ரம் பிரபு பேசுகையில், என் அப்பா இந்த கல்லூரியின் மாணவர் என்பதில் எனக்கு பெருமை. இந்த நிகழ்ச்சிக்கு வந்திருப்பது எனக்கு மகிழ்ச்சியளிக்கின்றது. அவரவர்களுக்கு கோல் அடிப்பதற்கு சரியான நேரம் கிடைக்கும். அப்பொழுது கோலை மிகச் சரியாக அடித்து விட வேண்டும்.
'துப்பாக்கி முனை' படத்தில் தாடி வைத்து நடித்திருந்தேன். அதை பார்த்து 'பொன்னியின் செல்வன்' படத்தில் நடிக்க அழைப்பு வந்தது. மெட்ராஸ் டாக்கீஸ்ல் பணியாற்றுவது மகிழ்ச்சி அளிக்கிறது. ராதிகா, சரத்குமார் ஆகியோருடன் நடித்தது நல்ல அனுபவமாக இருந்தது என்றார்.
