தமிழ் சினிமாவில் 1950ஆம் ஆண்டு வெளியான 'கிருஷ்ண விஜயம்' படத்தில் “ராதே நீ என்னை விட்டுப் போகாதேடி” என்ற பாடல் மூலம் பின்னணிப் பாடகராக அறிமுகமானவர் டிஎம் சௌந்தர்ராஜன். தமிழ் சமூகத்தின் வாழ்வையும், பண்பாட்டையும் தனது இசைப் பங்களிப்பின் மூலம் வளப்படுத்திய மக்களின் கலைஞன் இவர்.
தென்னிந்திய திரையுலகின் முன்னணி கதாநாயகர்களாக விளங்கிய எம்ஜிஆர், சிவாஜி கணேசன், ஜெமினி கணேசன், எஸ். எஸ். ராஜேந்திரன், ஜெய்ஷங்கர், ரவிச்சந்தர், நாகேஷ், என்.டி. ராமராவ், நாகேஸ்வர ராவ், ரஞ்சன், காந்தா ராவ், டி.எஸ். பாலையா, ஜக்கையா போன்றோருக்குப் பின்னணிப் பாடல் பாடியுள்ளார்.
டிஎம்எஸ் பாடகராக மட்டுமில்லாது, 'பட்டினத்தார்',`அருணகிரி நாதர்' என இரண்டு படங்களில் கதாநாயகனாக நடித்துள்ளார். பத்ம ஸ்ரீ, கலைமாமணி போன்ற மத்திய, மாநில அரசுகளின் பல உயரிய விருதுகளைப் பெற்று இந்தியாவின் தலைசிறந்த பின்னணிப் பாடகர்களில் ஒருவராக திகழ்ந்த டிஎம்எஸ். 2013ம் ஆண்டு தனது 91 ஆவது வயதில், உடல் நலக்குறைவு காரணமாக சென்னையில் காலமானார்.
1946லிருந்து 2007ஆம் ஆண்டு வரை சுமார் 61 ஆண்டுகள் திரைப்பட இசை வரலாற்றில் தவிர்க்க முடியாத பாடகராக திகழ்ந்த டிஎம்எஸ்ஸின் நினைவு தினம் இன்று (மே 25) அனுசரிக்கப்படுகிறது.
1922ஆம் ஆண்டு மதுரையில் மீனாட்சி அய்யங்காரின் இரண்டாவது மகனாக பிறந்தவர் டிஎம் சௌந்தர்ராஜன். சிறுவயது முதலே ஏற்பட்ட இசையின் மீதான நாட்டத்தால், காரைக்குடி ராஜா மணி ஐயங்காரிடம் கர்நாடக இசையின் நுட்பங்களை 2 ஆண்டுகள் கற்றுத்தேர்ந்தார்.
தனது 21ஆவது வயது முதல் கோயில்களில் கச்சேரி நடத்திவந்த டிஎம்எஸ், கலைஞர்களுக்கு உரித்தான வறுமை, வாய்ப்பு தேடலில் அவமானம், சோர்வு ஆகியவைகளை கடந்து வந்தார். தமிழ் மொழியை அதற்கே உரிய அழகோடு தெளிவாக உச்சரித்துப் பாடும் நுணுக்கம் அறிந்து தனது காந்தக் குரலால் மக்களை ஈர்த்தார். பாடல்களின் வரிகள் அவர் குரல் மூலமே உயிரும் உணர்வும் பெற்றன என திரைத்துறையினர் கூறுவது உண்டு.
‘வசந்த முல்லை போலே வந்து ’, ‘யாரடி நீ மோகினி’, 'வாழ நினைத்தால்’, ‘கொடி அசைந்ததும்’, ‘மலர்களைப் போல் தங்கை’, ‘எத்தனை காலம்தான்’, ‘திருடாதே பாப்பா’, ‘காசேதான் கடவுளப்பா’, ‘தூங்கதே தம்பி’, ‘எங்கே நிம்மதி’, ‘அங்கே சிரிப்பவர்கள்’, ‘உலகம் பிறந்தது எனக்காக’, ‘அதோ அந்த பறவை போல’, ‘நான் ஆணையிட்டால்’ உள்ளிட்ட பல பாடல் இன்றும் அதே கம்பீரத்துடன் அவரின் நினைவுகளை மக்களிடம் கொண்டு சேர்க்கிறது.
இவர் படத்திற்கு மட்டும் பாடல்கள் பாடாமால், ஆயிரத்திற்கும் மேற்பட்ட பக்தி பாடல்களை இசையமைத்துப் பாடியுள்ளார். `உள்ளம் உருகு தய்யா முருகா’,`சொல்லாத நாளில்லை சுடர்மிகு வடிவேலா’, `மண்ணானாலும் திருச்செந்தூரில் மண்ணாவேன்', ‘புல்லாங்குழல் கொடுத்த மூங்கில்களே', போன்ற பாடல்கள் ஒலிக்காத கோவில்களே இல்லை.
தமிழ், தெலுங்கு, மலையாளம், கன்னடம், இந்தி ஆகிய மொழிகளில் பத்தாயிரத்திற்கும் மேற்பட்ட பாடல்களைப் பாடியுள்ள டிஎம்எஸ் தமிழில் மட்டும் 10 ஆயிரம் பாடல்கள் பாடியுள்ளார்.
இதையும் படிங்க: பேஸ்புக் மூலம் கரோனா நிதி திரட்டும் எஸ்.பி. பாலசுப்ரமணியம்
