தென்னிந்திய மொழிகளில் மிகவும் பிரபலமான நடிகையாக விளங்கும் பூஜா, இலங்கையைப் பூர்விகமாகக் கொண்டவர். இவர் சந்தியா - உமாஷங்கர் தம்பதியருக்கு ஜூன் 25, 1981ஆம் ஆண்டு பிறந்தார். இவரது தாயார் இலங்கையையும், தந்தை இந்தியாவின் கர்நாடக மாநிலத்தையும் பூர்விகமாகக் கொண்டவர்கள். இலங்கையில் தொடக்கப்பள்ளியை முடித்த பின்னர், இந்தியாவிலேயே தனது எம்பிஏ படிப்பு வரை கற்றுத் தேர்ந்தார்.
முதன் முதலாக பூஜாவின் நண்பர் ஒருவரே, அவரை இயக்குநர் ஜீவாவுக்கு அறிமுகப்படுத்தினார். அவரது இயக்கத்தில் வெளியான ’உள்ளம் கேட்குமே’ திரைப்படத்தில், ஆங்கிலோ - இந்தியன் கதாபாத்திரத்தில் நடித்து திரைத்துறைக்குள் காலடி எடுத்துவைத்தார்.
அந்தத் திரைப்படத்தின் மூலம் கிடைத்த வருவாயை தனது படிப்பு, இதர தேவைக்குப் பயன்படுத்திக்கொள்வது மட்டுமே அப்போது அவரது எண்ணமாக இருந்தது. மீண்டும் நடிக்கக் கூடாது என்றும் எண்ணிக் கொண்டிருந்தார். பின்னர் தவிர்க்க முடியாத காரணத்தால் சரண் இயக்கத்தில், நடிகர் மாதவனின் ஜோடியாக 'ஜேஜே' படத்தில் நடிக்க ஒப்பந்தமானார்.
’உள்ளம் கேட்குமே’ திரைப்படம் வெளியாவதற்கு முன்னரே, அவரது இரண்டாவது படமான ’ஜேஜே’ திரைப்படம் வெளியாகி, உற்சாகம் தரக்கூடிய வகையில் நல்ல விமர்சனங்களைப் பெற்றார். அதன் பின்னர் நடிகர் அஜித் நடிப்பில் வெளியான ’அட்டகாசம்’ திரைப்படத்தில், கதாநாயகியாக நடித்தார்.
அதன் பின்னர் தொடர்ச்சியாக பட வாய்ப்புகள் குவிய நடிப்பில் படு பிசியானார் பூஜா. தமிழ் இளைஞர்களின் கனவுக் கன்னியாக, காதல் கதாபாத்திரங்களில் மட்டுமே தொடர்ந்து நடித்துவந்த பூஜா, இயக்குநர் பாலா இயக்கத்தில் வெளியான ‘நான் கடவுள்’ படத்தில் நடிக்க ஒப்பந்தமானார்.
இந்தத் திரைப்படமே இவரது நடிப்புத்திறமையை உலகறியச் செய்து, சிறந்த நடிகைக்கான பல விருதுகளைப் பெற்றுத் தந்தது.
சிங்களத்தில் இவர் நடித்த ’அஞ்சலிகா’ என்ற படம் மாபெரும் வெற்றிபெற்றது. பின்னர் அவர் சிங்கள சினிமாவில் பல பிளாக்பஸ்டர் படங்களில் நடித்து புகழின் உச்சத்தைத் தொட்டார். அதிகப் பொருள்செலவில் எடுக்கப்பட்ட ’குசா பாபா’, இலங்கைத் திரையுலக வரலாற்றில் அதுவரை யாரும் கண்டிராத அளவுக்கு வசூல் மழையைக் குவித்தது.
2007ஆம் ஆண்டில் வெளியான ’பாந்தயா கோஜி’ என்னும் திரைப்படத்தால் மலையாளத் திரையுலகையும் தனது நடிப்பால் மதிமயங்கச் செய்தார் பூஜா. தொழிலதிபர் தீபக் சண்முகநாதனுடன் பூஜாவுக்குத் திருமண நிச்சயதார்த்தம் நடந்து ஓராண்டுக்குப் பின்னர் இருவரும் பிரிந்துவிட்டனர்.
அதன் பின்னரே இலங்கைத் தொழிலதிபர் பிரஷன் டேவிட் விதகனை 2017ஆம் ஆண்டு மணந்துகொண்டார்.
இந்நிலையில் இன்று (ஜூன் 25) தனது 40ஆவது பிறந்தநாளைக் கொண்டாடும் பூஜாவுக்கு, #HappyBirthdayPooja என்ற ஹேஷ்டேக் மூலம் அவரது ரசிகர்கள் சமூக வலைதளங்களில் வாழ்த்து தெரிவித்துவருகின்றனர்.
இதையும் படிங்க: நயன்தாராவை எதிர்க்கும் 'நானி' பட பிரபலம்?
