ஃபெப்சி தொழிலாளர்களுக்கு உதவிய 'ஹீரோ' சிவகார்த்திகேயன்!

கரோனா வைரஸ் பாதிப்பைத் தொடர்ந்து திரைத்துறையின் பணி நிறுத்தத்தால், வாழ்வாதாரத்தை இழந்த ஃபெப்சி தொழிலாளர்களுக்கு நடிகர் சிவகார்த்திகேயன் நிதியளித்துள்ளார்.

உலகெங்கிலும் அச்சுறுத்தலை ஏற்படுத்தியுள்ள கரோனா வைரஸ் தொற்றால் பல துறைகள் நஷ்டமடைந்துள்ளன. இதனால் ஏழை மக்கள் பலரும் தங்கள் அன்றாட வாழ்க்கையில் பெரும் சிக்கலைச் சந்தித்து வருகின்றனர்.

இந்தத் தாக்குதலிலிருந்து திரைத்துறையும் தப்பவில்லை. திரைத்துறையையே நம்பி பல குடும்பங்கள் உள்ள நிலையில், தென்னிந்திய திரைப்படத் தொழிலாளர் சம்மேளனம் எனப்படும் ஃபெப்சியில் (FEFSI) பணிபுரியும் ஆயிரக்கணக்கான தொழிலாளர்கள் கரோனா காரணமான பணி நிறுத்தத்தினால் பெரியளவில் பாதிக்கப்பட்டுள்ளனர்.

இதைத் தொடர்ந்து ஃபெப்சி சம்மேளனத்தின் தலைவர் ஆர். கே. செல்வமணி, நடிகர், நடிகைகளை ஃபெப்சி தொழிலாளர்களுக்கு உதவ முன்வருமாறு கோரிக்கை விடுத்தார். இதனையடுத்து சூர்யாவும் கார்த்தியும் தொழிலாளர்களுக்கு உதவ 10 லட்சம் ரூபாய் நிதி வழங்கினர்.

இவர்களைத் தொடர்ந்து நடிகர் சிவகார்த்திகேயனும் 10 லட்சம் ரூபாய் நிதி வழங்கியுள்ளார்.