சென்னை: இயக்குநரும், நடிகருமான டி.ராஜேந்தரும் அவரது மனைவி உஷாவும், சிம்பு படத்தை வெளியிடவிடாமல் கோலிவுட்டில் கட்டப் பஞ்சாயத்து செய்துவருவதாக சென்னை மாநகர காவல் ஆணையரிடம் புகார் அளித்தனர்.
இதனையடுத்து அவர்கள் செய்தியாளர்களைச் சந்தித்துப் பேசினார்.
அப்போது உஷா கூறியதாவது, "நடிகர் சிம்பு நடித்த, 'அன்பானவன் அசராதவன் அடங்காதவன்' படத்தைத் தயாரிப்பாளர் மைக்கேல் ராயப்பன் தயாரித்திருந்தார். அந்தப் படத்தை விநியோகம் செய்த விநியோகஸ்தருக்கு நஷ்டம் ஏற்பட்டு இருக்கிறது. அந்த நஷ்டத்தை மைக்கேல் ராயப்பன் தான் தரவேண்டும்.
ஆனால், நடிகர் சிலம்பரசன் தான் தரவேண்டும் என்று கட்டப்பஞ்சாயத்து செய்து கொண்டிருக்கிறார். தமிழ் திரைப்படத் தயாரிப்பாளர்கள் சங்கம் ஒவ்வொரு சிலம்பரசன் நடித்த படங்கள் ஆரம்பிக்கும்போதும் பஞ்சாயத்துக்கு, எங்களைக் கூப்பிட்டு, பல கோடிகளைப் பெற்றுக்கொண்ட பிறகுதான், படத்தில் நடிப்பதற்கு அனுமதிக்கிறார்கள்.
அதேபோல முடியும்போதும், படத்தை வெளியிடுவதற்கு 'ரெட் கார்டு' என்ற பெயரில், படத்திற்கு தடைபோட்டுப் பல கோடி தரவேண்டும் என்று எங்களை மிரட்டுகிறார்கள்.
இப்போது புதிதாக அருள்பதி என்பவர் தமிழ்த் திரைப்பட நடப்பு விநியோகஸ்தர்கள் சங்கம் என்று ஒரு சங்கத்தை ஆரம்பித்துள்ளார். அவர் இருபது, இருபத்தைந்து பேரை வைத்து சிலம்பரசனின் எந்த படத்தையும் ரிலீஸ் பண்ணவிடாமல் கட்டப்பஞ்சாயத்து செய்து வருகின்றார். எங்களுக்குப் பக்க பலமாக அரசு இருக்கிறது.
இதை முதலமைச்சரின் கவனத்திற்கு நிச்சயமாகக் கொண்டு செல்வோம். அதற்காக அவருடைய வீட்டு வாசலிலும் உண்ணாவிரதம் இருப்பதற்குத் தயாராக இருக்கிறேன்.
இதுபோன்று கட்டப்பஞ்சாயத்தால் பல தயாரிப்பாளர்கள், விநியோகஸ்தர்கள், நடிகர்கள் பாதிக்கப்பட்டுள்ளனர்.
இதனைத்தடுப்பதற்காக இன்று (அக்.20) காவல் ஆணையர் அலுவலகத்தில் புகார் அளித்தேன்.
நல்லதே நடக்கும் என நினைக்கிறேன். சிலம்பரசன் நிஜமாகவே யாருக்காவது பணம் கொடுக்க வேண்டுமென்றால், கொடுக்கத் தயாராக இருக்கிறார். ஆனால், யாருக்கும் தர வேண்டிய நிலைமை இல்லை" எனத் தெரிவித்தார்.
தொடர்ந்து பேசிய டி.ராஜேந்தர், "ரெட் கார்டு என்று தெரிவிப்பதற்கு எந்த ஒரு அங்கீகரிக்கப்பட்ட ஆவணம் என்று எதுவுமில்லை. 'அன்பானவன் அசராதவன் அடங்காதவன்' படத்தில் நடிகர் சிலம்பரசன் நடித்து மட்டுமே கொடுத்தார்.
ஒரு படம் நஷ்டம். அதற்கு எப்படி நடிகர் பொறுப்பு ஏற்க முடியும். இது சிலம்பரசனுக்கு மட்டுமில்லாமல், இந்த பிரச்னை பல நடிகர்களுக்கும் உள்ளது.
கோடம்பாக்கத்தைக் கட்டப்பஞ்சாயத்துக் கோட்டையாக மாற்றி வருகிறார்கள். கடந்த ஆட்சியிலும் கட்டப் பஞ்சாயத்து செய்து கொண்டிருந்தார்கள்.
இந்த ஆட்சியிலும் அதிகமாக செய்ய நினைத்துச் செயல்பட்டு வருகின்றனர். திரைப்படத்தைத் திரையரங்குகளில் வெளியிட விடாததால் தான் பல படங்கள் ஓடிடி தலங்களுக்குச் செல்கிறது" எனத் தெரிவித்துள்ளார்.
இதையும் படிங்க: பாடகி சித்ராவிற்கு ஐக்கிய அரபு அமீரகம் வழங்கிய மிகப்பெரும் அங்கீகாரம்!
