வாய்ப்பே இல்ல சித்தார்த்... நீங்க வேற லெவல்!

நடிகர் சித்தார்த் அவ்வப்போது சமூக பிரச்னைகள், அரசியல் குறித்து தனது ட்விட்டர் பக்கத்தில் கருத்து தெரிவித்து இணையத்தை கலக்கிவருகிறார். அந்தவகையில் தற்போது அவர் பதிவிட்டுள்ள ட்வீட் பன்னாட்டு அரசியலில் பரபரப்பை ஏற்பட்டுள்ளது.

தமிழில் பாய்ஸ், அரண்மனை 2 உள்ளிட்ட படங்களில் நடித்தவர் சித்தார்த். இவர் தமிழ் மட்டுமல்லாது இந்தி, தெலுங்கு போன்ற மொழி படங்களிலும் நடித்துள்ளார்.

நடிகர் சித்தார்த் சினிமா மட்டுமின்றி சமூக பிரச்னைகள் குறித்தும் - அரசியல் தலைவர்கள், அரசியல் கட்சிகளைக் குறித்தும் அவ்வப்போது ட்விட்டர் பக்கத்தில் சர்ச்சைக்குரிய வகையில் கருத்துகளை தெரிவித்தும் வருவார். சில சமயம் இவரது ட்வீட் இணையத்தில் வைரலாகியும் வரும்.

இந்நிலையில் சித்தார்த் தனது ட்விட்டர் பக்கத்தில், 'டொனால்ட் ட்ரம்ப் அவர்களே, நீங்கள் தற்போது தேர்தலுக்கு தயாராகி வருவதால் எனக்கு ஒரு பேட்டி கொடுக்க வேண்டும் என விரும்புகிறேன். நீங்கள் எப்படி சாப்பிடுவீர்கள், நீங்கள் என்ன சாப்பிடுவீர்கள், எப்படி தூங்குவீர்கள், உங்களுக்குடைய அழகின் ரகசியம் என்ன என்பது குறித்த நிறைய கேள்விகள் என்னிடம் இருக்கின்றன. என்னிடம் இந்திய கடவுச்சீட்டு (பாஸ்போர்ட்) இருக்கிறது' என்று அதில் பதிவிட்டுள்ளார்.

சித்தார்த்தின் இந்த ட்வீட் தற்போது சமூக வலைதளங்களில் வைரலாகிவருகிறது. அண்மையில் பாலிவுட் நடிகர் அக்‌ஷய் குமார், பிரதமர் மோடியை பேட்டி எடுத்தார். அந்த பேட்டியில் அரசியல் பற்றி எதுவும் கேட்காமல், மோடியின் சொந்த வாழ்க்கை தொடர்பான கேள்விகளை மட்டுமே கேட்டிருந்தார்.

சித்தார்த் ட்வீட்

இதை கலாய்க்கும் விதமாக நடிகர் சித்தார்த் இந்தப் பதிவை பதிவிட்டிருப்பதாக பலரும் கருத்து தெரிவித்துவருகின்றனர்.