கரோனா தொற்று அச்சுறுத்தல் தொடங்கிய சமயத்தில், ஜோர்டான் நாட்டில் நடைபெற்று வந்த 'ஆடுஜீவிதம்' படப்பிடிப்பில் நடிகர் பிரித்விராஜ் கலந்து கொண்டிருந்தார். அதன்பின், அங்கிருந்து இந்தியா திரும்ப முடியாமல் சிக்கித் தவித்தார். இறுதியாக மே மாதம் படக்குழுவினருடன் பிரித்விராஜ் கொச்சி வந்தடைந்தார்.
இரண்டு வாரங்கள் தனிமைப்படுத்தலுக்குப்பின் தனது குடும்பத்தினருடன் பிரித்விராஜ் நேரத்தை செலவிட்டு வருகிறார். அதுமட்டுமல்லாது அவ்வப்போது ஜிம்மில் பயிற்சி செய்யும் புகைப்படங்களை வெளியிட்டு சமூக வலைதளத்தில் வைரலாகி வருகிறார். தற்போது பிரித்விராஜ் தனது மனைவியுடன் கமல் நடிப்பில் உருவான சூப்பர்ஹிட் நகைச்சுவை திரைப்படம் 'மைக்கேல் மதன காமராஜன்' படத்தை பார்த்து தனது ட்விட்டர் பக்கத்தில் வெகுவாக பாராட்டியுள்ளார்.
அந்த படம் தொடர்பாக பிரித்விராஜ் தனது ட்விட்டர் பதிவில் கூறியிருப்பதாவது, 'மைக்கேல் மதன காமராஜன்' போல மிகச் சில படங்களே உங்களை மகிழ்விக்கும். உலக சினிமாவின் மிகச் சிறந்த நடிகர்களில் கமல்ஹாசனும் ஒருவர். ஊர்வசி ஒரு ஆளுமை. என்றென்றும் கிளாசிக்கான இப்படத்தை மனைவியுடன் மீண்டும் பார்த்தேன் என்று பதிவிட்டார்.
