தமிழர்கள் போன்றே தமிழ்மொழி பேசும் 'மாமாங்கம்' மம்மூக்கா!

எந்த மொழியிலும் நல்ல கருத்துக்களையே, நல்ல படங்களையே ஆதரிப்பதில் தமிழ் ரசிகர்கள் எப்போதும் முன்னோடிகள் என்று 'மாமாங்கம்' படத்தின் இயக்குநர் பத்மகுமார் தெரிவித்துள்ளார்.

பத்மகுமார் இயக்கத்தில் மம்மூட்டி நடித்து உருவாகி வரும் வராலாற்றுத் திரைப்படம் 'மாமாங்கம்'. இதில் பிரஜி தேசாய், மாளவிகா மேனன், உன்னி முகந்தன் உள்ளிட்டோர் முக்கிய கதாபாத்திரம் ஏற்று நடிக்கின்றனர். இந்தப் படத்தை காவ்யா பிலிம்ஸ் நிறுவனம் தயாரித்துள்ளது.

கேரளாவிலுள்ள மலபார் பகுதியில் கொண்டாடப்படும் 'மாமாங்கம்' என்ற திருவிழாவை அடிப்படையாகக் கொண்டு இப்படம் உருவாகியுள்ளது. சமீபத்தில் வெளியான இப்படத்தின் டீசர் ரசிகர்கள் மத்தியில் நல்ல வரவேற்பை பெற்றுள்ளது. 18ஆம் நூற்றாண்டுக்கு முந்தைய காலகட்டத்தில் அமைந்துள்ள படம் வரும் நவம்பர் 21ஆம் தேதி மலையாளம், தமிழ், இந்தி ஆகிய மொழிகளில் வெளியாகிறது. இப்படத்தின் தமிழ் பதிப்பில் மம்முட்டியே சொந்தமாக குரல் கொடுத்துள்ளார்.

மாமங்கம் மம்மூக்கா

இப்படம் குறித்து பத்மகுமார் கூறுகையில், மம்மூட்டியின் பிரபலம், ரசிகர்கள் வட்டம் மலையாளத்தை கடந்து இந்தியா முழுவதும் பரவி உள்ளது. தமிழில் அவர் பல தொடர் வெற்றிப்படங்களை தந்து பெரும் ரசிகர் பட்டாளத்தை பெற்றுள்ளார். தமிழ்ப்படங்களில் அவரது தமிழ் உச்சரிப்பு மிகத்தெளிவாக, தமிழ் மண் மனம் மாறாததாக இருக்கும். தமிழர்கள் போன்றே பேசும் அவரது தமிழ்மொழி வன்மை, மலையாள நடிகர்களை பிரமிப்பில் ஆழ்த்தும்.

படத்திற்கு தானே தமிழில் குரல் கொடுப்பதாக அவர் எடுத்துக்கொண்ட சிரத்தை எங்களை வெகுவாக ஆச்சர்யப்படுத்தியது. அதிலும் பழங்காலத் தமிழ் மொழியை உச்சரிப்பை தன் குரலில் தமிழ் ரசிகர்களுக்காக பலமுறை ரிகர்சல் செய்து டப்பிங் செய்துள்ளார்.

தமிழ் வசங்களை எழுதி , டப்பிங் பணிகளிலும் பேருதவியாய் இருந்த இயக்குநர் ராமுக்கு நன்றி. இப்படத்தினை ஒரே நேரத்தில் மலையாளம், தமிழ், தெலுங்கு மொழிகளில் வெளியிட திட்டமிட்டுள்ளோம். தமிழ் டீசருக்கு கிடைத்த வரவேற்பு எங்களை பெருமகிழ்ச்சியில் ஆழ்த்தியுள்ளது. எந்த மொழியிலும் நல்ல கருத்துக்களை, நல்ல படங்களை ஆதரிப்பதில் தமிழ் ரசிகர்கள் எப்போதும் முன்னோடிகள் அவர்களது அன்பு இதன் மூலம் மீண்டும் உறுதியாகியுள்ளது.

1680ஆம் ஆண்டு காலகட்டப் பின்னணியில் 12 வருடங்களுக்கு ஒரு முறை பழரிப்பட்டுவின் திருநாவையாவில் நடக்கும் கலாச்சார விழாவை களமாக கொண்டுக் கதை அமைக்கப்பட்டுள்ளது. இந்தப் பின்னணியில் ராஜா ஜாமோரின் எனும் மன்னனின் அடக்குமுறைக்கு எதிராக போராடிய சாவேர்ஸ் எனும் ஒரு சிறு போராட்ட குழுவை மையமாக கொண்டது தான் “மாமாங்கம்” திரைப்படம்.

அக்குழுவில் இதுவரை எவராலும் சாதிக்க முடியாததை சாதித்த உண்மையான நாயகன், முடியாததை முடித்துக்காட்டிய வரலாற்றில் மறைக்கப்பட்ட மிகப்பெரும் போர் வீரனின் கதையே. அவனின் வெற்றியை பெரும் பட்ஜெட்டில் சொல்லும் பிரமாண்ட படைப்பாக இப்படம் இருக்கும் என்றார்.

இதையும் வாசிங்க: 29 ஆண்டுகளுக்கு முன் மம்முட்டி பேசிய அழகு தமிழ் - 'மெளனம் சம்மதம்' கொண்டு வந்த டிரெண்ட்!