மலையாளத்தில் கடந்த ஆண்டு வெளியான படம் ஜோசப். இப்படத்தில் நடிகர் ஜோஜூ ஜார்ஜ், தீலிப் போத்தன் உள்ளிட்டோர் நடித்திருந்தனர். இப்படம் அங்கு மிகப்பெரிய வரவேற்பைப் பெற்றது. சிறப்பு நடுவர் பிரிவில் இப்படத்திற்கு தேசிய விருதும் கிடைத்துள்ளது.
தற்போது இந்தப் படத்தை தமிழில் ரீமேக் செய்ய இருப்பதாக தகவல் வெளியாகியுள்ளன. ஜோசப் படத்தின் இயக்குநர் பத்மகுமாரே இப்படத்தையும் இயக்க உள்ளார்.
இப்படத்தில் நடிகர் ஆர்கே சுரேஷ் நடிக்க இருப்பதாக நம்பத்தகுந்த வட்டாரங்கள் தெரிவிக்கின்றன. இப்படத்தின் படப்பிடிப்பு அடுத்த ஆண்டு மார்ச் மாதம் தொடங்க உள்ளதாகவும், இப்படத்தை இயக்குநர் பாலா தயாரிக்க உள்ளதாகவும் கோலிவுட் வட்டாரங்கள் கூறுகின்றன.
இப்படம் குறித்து ஆர்கே சுரேஷ் கூறுகையில், நல்ல கதையம்சம் கொண்ட திரைப்படங்களில் மட்டுமே நடிக்க வேண்டும் என முடிவெடுத்தேன். அப்போது தான் ஜோசப் படத்தை பார்த்தேன். நான் சமீபத்தில் பார்த்த சிறந்த படம். இந்த படத்தின் கதைப்பிடித்து விட்டது என்றார். இப்படத்தில் நடிக்கும் நடிகர்கள், தொழில் நுட்ப கலைஞர்கள் குறித்த அறிவிப்பு விரைவில் வெளியாகும் என எதிர்பார்க்கப்படுகிறது.
