'குட்டி லவ் ஸ்டோரி' படத்திற்காக ஒன்றிணையும் முன்னணி இயக்குநர்கள்! - இயக்குனர் கௌதம் மேனனின் திரைப்படங்கள்

சென்னை: காதலை மையப்படுத்தி நான்கு முன்னணி இயக்குநர்கள் ஒன்றிணைந்து 'குட்டி லவ் ஸ்டோரி' என்னும் புதிய படத்தை இயக்க உள்ளனர்.

'குட்டி லவ் ஸ்டோரி

Published : Sep 2, 2020, 10:42 PM IST

எல்.கே.ஜி, கோமாளி, பப்பி, எனை நோக்கி பாயும் தோட்டா ஆகிய படங்களை தயாரித்த வேல்ஸ் ஃபிலிம்ஸ் இண்டர்நேஷனல் நிறுவனம் தற்போது தயாரிக்கும் புதிய படம் 'குட்டி லவ் ஸ்டோரி'.

ஆந்தாலஜியாக தயாராகும் இந்த படத்தை இயக்குநர்கள் கௌதம் வாசுதேவ் மேனன், வெங்கட் பிரபு, விஜய், நலன் குமாரசாமி இணைந்து இயக்குகிறார்கள்.

தயாரிப்பாளர் ஐசரி கணேஷ்

இதுகுறித்து வேல்ஸ் ஃபிலிம்ஸ் இண்டர்நேஷனல் நிறுவன தயாரிப்பாளர் ஐசரி கணேஷ் கூறுகையில்,"எல்லார் மனதிலும் எந்தக்காலத்திலும் நீங்காது இடம்பிடித்திருப்பது காதல் கதைகள் தான். அப்படியான ஒரு காதல் கதையை தயாரிக்க வேண்டுமென மிக நீண்ட காலமாக நினைத்திருந்தேன். அந்த வகையில் மிக அழகான தயாரிப்பாக இப்படைப்பு அமைந்திருப்பது மனதிற்கு பெரும் மகிழ்ச்சியை தந்திருக்கிறது. ஒரு ரசிகனாக இயக்குநர்கள் கௌதம் வாசுதேவ் மேனன், விஜய், வெங்கட் பிரபு, நலன் குமாரசாமி ஆகியோரின் படங்கள் எந்த வகை ஜானராக இருந்தாலும் அதில் வெளிப்படும் கவிதைத்தனத்தையும், அதிரவைக்கும் காட்சித் தொகுப்பையும், மிளிரும் உணர்வுக் குவியல்களையும் மனம்பொங்க ரசித்திருக்கிறேன். இவர்களுடன் இணைந்து இப்படைப்பில் பங்கேற்பதை பெரும் பாக்கியமாக கருதுகிறேன். படத்தின் இறுதி வடிவத்தை வெகு ஆவலுடன் காத்திருக்கிறேன். மிக விரைவில் படத்தில் பங்கேற்கும் நடிகர்கள், தொழில் நுட்ப கலைஞர்கள் குழுவை அதிகாரப்பூர்வமாக அறிவிக்க உள்ளோம். இப்படத்தில் பணிபுரியும் இயக்குநர்கள் அனைவருமே தமிழ் சினிமாவை தங்கள் படைப்புகள் மூலம் ஒரு படி முன்னெடுத்து சென்றவர்கள். தங்களுக்கான தனி முத்திரையை உருவாக்கி வைத்திருப்பவர்கள் அவர்களுடன் தனியாக படங்களில் பணிபுரிய வேல்ஸ் ஃபிலிம்ஸ் இண்டர்நேஷனல் நிறுவனம் எப்போதும் ஆவலுடன் காத்திருக்கிறது. ஏற்கனவே இக்குழுவில் இயக்குநர் கௌதம் வாசுதேவ் மேனன் இயக்கத்தில் வருண் நடிக்க 'ஜோஷ்வா இமைபோல் காக்க' திரைப்படத்தை தயாரித்து வருகிறோம். இன்னும் ஆச்சர்யப்படுத்தும் படைப்புகள் பற்றிய அறிவிப்புகள் அடுத்தடுத்து வெளிவரும்.தற்போது 'ஜோஷ்வா இமைபோல் காக்க', 'மூக்குத்தி அம்மன்', 'சுமோ' ஆகிய படங்கள் தயாரிப்பில் உள்ளன என்று கூறினார்.