சினிமா மட்டுமில்ல; வெப்சீரிஸிலும் தொடர்ந்து நடிப்பேன் - இறங்கி வந்த அக்‌ஷராஹாசன்

வெப்சீரிஸ் தொடரை குறுகிய நாட்களில் எடுத்து முடித்துவிடலாம். சினிமா, வெப்சீரிஸ் ஆகிய இரண்டிலும் தொடர்ந்து நடிப்பேன் என்று நடிகை அக்‌ஷரா ஹாசன் கூறியுள்ளார்.

சென்னை: நடிகை அக்‌ஷரா ஹாசன் அறிமுகமாகவிருக்கும் வெப்சீரிஸ் தொடரின் பத்திரிகையாளர் சந்திப்பு சென்னையில் நடைபெற்றது. இந்தத் தொடர் செப்டம்பர் மாதம் இணையத்தில் ஸ்டிரீமாகவுள்ளது.

இயக்குநர் விஷ்ணுவர்தன் தயாரித்துள்ள 'ஃபிங்கர் டிப்' என்ற வெப் சீரிஸ் தொடரில் நடிகை அக்‌ஷரா ஹாசன் உள்ளிட்ட பல திரைப்பிரபலங்கள் நடித்துள்ளனர். இந்தத் தொடர் 5 பாகங்களைக் கொண்டுள்ளது. இவை அனைத்தும் வெவ்வேறு கதை பின்னணியில் தயாரிக்கப்பட்டிருக்கும் நிலையில், வரும் செப்டம்பர் 1ஆம் தேதி வெளியிடப்படுகிறது.

இந்த நிலையில், 'ஃபிங்கர் டிப்' வெப்சீரிஸ் குறித்த பத்திரிகையாளர் சந்திப்பு பிரசாத் லேபில் நடைபெற்றது. இந்த நிகழ்ச்சியில் நடிகை அக்‌ஷரா ஹாசன், சுனைனா, நடிகர் கிருஷ்ணா, அஸ்வின் உள்ளிட்ட பலர் கலந்து கொண்டனர்.

நிகழ்ச்சியில் நடிகை அக்‌ஷரா ஹாசன் பேசியதாவது,

"வெப் சீரிஸூக்கும், சினிமாவுக்கும் பெரிய வித்தியாசம் இல்லை. இரண்டுக்கும் திரைக்கதை அமைப்பதில் வித்தியாசம் உள்ளது. ஒரு சினிமா எடுப்பதற்கு அதிக காலங்கள் தேவை. ஆனால் வெப் சீரியஸ் தொடரை மிகக் குறுகிய நாட்களிலேயே எடுத்து முடித்து விடலாம். சினிமா மற்றும் வெப் சீரியஸ் ஆகியவற்றில் தொடர்ந்து நடிப்பேன்" என்றார்.