28 வருடங்களை கடந்து இன்றவும் வாடாத ரோஜாவாக வலம் வந்து கொண்டிருக்கும் ஏ.ஆர். ரஹ்மான் இன்று தனது 54ஆவது பிறந்தநாளைக் கொண்டாடுகிறார். இந்திய இசை உலகமே பெருமையுடன் கொண்டாடும் ஏ.ஆர். ரஹ்மான் 1966ஆம் ஆண்டு, சென்னையில் பிறந்தார். இவருடைய அப்பா சேகர், சுமார் 50க்கும் மேற்பட்ட மலையாளத் திரைப்படங்களில் இசையமைப்பாளராகப் பணியாற்றிவர்.
ஒன்பதாவது வயதில் தந்தையை இழந்த ஏ.ஆர். ரஹ்மான் பள்ளிப்படிப்பை பாதியிலேயே நிறுத்தினர். குடும்ப சூழ்நிலை கருதி எலக்ட்ரானிக் இன்ஜினியரிங் பயில வேண்டும் என்ற தனது சிறு வயது கனவை கைவிட்டு தந்தையின் இசைக் கருவிகளை வாடகைக்கு விட்டு அதிலிருந்து கிடைத்த வருமானத்திலிருந்து பியானோ, ஹார்மோனியம் மற்றும் கிதார் ஆகிய இசைக்கருவிகளை வாசிக்கக் கற்றுக்கொண்டார். பின்னர் தன்ராஜ் மாஸ்டரிடம் முறைப்படி இசையும் கற்றார்.
1980ஆம் ஆண்டு, தனது 13ஆவது வயதில் தூர்தர்சனில் ஒளிபரப்பான 'வொண்டர் பலூன்' எனும் நிகழ்ச்சியில், ஒரே நேரத்தில் நான்கு கீ போர்டுகளை வாசித்து, மக்கள் மத்தியில் கவனம் பெற்றார்.
இசைஞானி இளையராஜாவின் இசைக்குழுவில் கீபோர்டு வாசிப்பாளராகச் சேர்ந்த ரஹ்மான், பின்னாளில் எம்.எஸ்.விஸ்வநாதன், ரமேஷ் நாயுடு, ஜாகீர் உசேன் மற்றும் குன்னக்குடி வைத்தியநாதன் உள்ளிட்ட பல இசையமைப்பாளர்களிடமும் பணியாற்றினார். டிரினிட்டி காலேஜ் ஆப் மியூசிக் கல்லூரியில் கிளாசிக்கல் மியூசிக்கில் பட்டம் பெற்றார்.
மோகன்லாலின் யோதாவா என்னும் மலையாலப் படத்திற்கு முதல் முறையாக இசையமைத்தார் ஏ.ஆர் ரஹ்மான். அதற்கு அடுத்ததாக இசையமைத்த மணிரத்னத்தின் ரோஜா திரைப்படம் யோதாவா படத்திற்கு முன்பாகவே வெளியானதால், அதுவே அவரது முதல் படமானது. தனது முதல் படத்திலேயே தேசிய விருதினை வென்றார்.
இசையில் புதுமை புகுத்திய ரஹ்மான், கிராமியப் பாடல்களிலும், தான் சலித்தவர் அல்ல என்பதை கிழக்கு சீமையிலே, கருத்தம்மா போன்ற படங்களின் பாடல்கள் மூலம் உணர்த்தினார்.
ரங்கீலா படத்தின் மூலம் பாலிவுட்டில் அறிமுகமான அவருக்கு, நாடு முழுவதும் ரசிகர்கள் திரண்டார்கள். மேலும், ஒரே ஆண்டில் இரண்டு ஆஸ்கர் விருதுகளை பெற்றார். அதன் மூலம் ஒரே ஆண்டில் இரண்டு ஆஸ்கர் விருதுகளைப் பெற்ற ஒரே இந்தியர் என்ற பெருமைக்குச் சொந்தக்காரரானார்.
ஜெய் ஹோ பாடல் முதலில் சல்மான்கான் நடித்த யுவராஜ் என்னும் படத்திற்காக இசையமைக்கப்பட்டது. சில காரணங்களால் அப்படத்தில் பயன்படுத்தப்படாமல், பின்பு ஸ்லம் டாக் மில்லியனர் திரைப்படத்தில் பயன்படுத்தப்பட்டது. திரைப்பட பாடல்கள் மட்டுமல்ல அவர் இசையமைத்த ஏர்டெல் டியூன், 150 மில்லியன் பதிவிறக்கங்களை கடந்து உலக அளவில் அதிகம் பதிவிறக்கம் செய்யப்பட்ட மொபைல் டியூனானது.
இதையும் படிங்க: யுவன் - தற்கால இசையின் ‘இளைய’ ராஜா #23YearsOfYuvanism
ஒபாமா அமெரிக்க அதிபராக இருந்தபோது, வெள்ளை மாளிகையில், இசை கச்சேரி நடத்திய ஒரே இந்திய கலைஞன் என்ற பெருமைக்கும் உரியவரானார். பின்னாளில் ஒபாமா அவருக்கு கிறிஸ்துமஸ் வாழ்த்து அட்டையை அனுப்பி, வெள்ளை மாளிகை விருந்தில் கலந்துகொள்ள வருமாறு அழைப்பு விடுத்தார்.
4 தேசிய விருதுகள் , 15 பிலிம்பேர் விருதுகள், 14 தென்னிந்திய பிலிம் பேர் விருதுகள் என இசையுலகின் முடிசூடா மன்னாக வலம் வருகிறார்.
இசைப்பயணத்தில் ஒருமுறைகூட வெள்ளித்திரையில் தோன்றாத ஏ.ஆர்.ரஹ்மான், அட்லி இயக்கத்தில் விஜய் நடிப்பில் வெளியான பிகில் படத்தில் இடம்பெற்ற சிங்கப்பெண்ணே பாடலில் முன்முறையாகத் தோன்றினார். அவரது மகன் அமீன் ரஹ்மானுக்கும் இன்று பிறந்தநாள். இசையை உலக அரங்கிற்கு கடத்திய ஏ.ஆர். ரஹ்மானின் 54ஆவது பிறந்தநாளை இன்று அவரது ரசிகர்கள் கொண்டாடி வருகின்றனர்.
கடவுளை காண்பதற்கும், உணர்வதற்கும், அடைவதற்கும் இசை ஒரு வழி. அப்படி, கடவுளை அடையும் வழியில் ரஹ்மானின் பெயரும் இருக்கும். பிறந்தநாள் வாழ்த்துகள் ஏ.ஆர். ரஹ்மான்
இதையும் படிங்க: இளையராஜாவுக்கு நன்றிக்கடன்பட்டிருக்கிறது இயற்கை....
