'தனுசு ராசி நேயகர்களே' தனுஷூக்கான படம் இல்லை - இயக்குநர் சஞ்சய் பாரதி

'தனுசு ராசி நேயர்களே' படத்தின் கதையை நடிகர் தனுஷை மையமாக வைத்து எழுதவில்லை என படத்தின் இயக்குநர் சஞ்சய் பாரதி தெரிவித்துள்ளார்.

புதுமுக இயக்குநர் சஞ்சய் பாரதி இயக்கத்தில் நடிகர் ஹரீஷ் கல்யாண் நடிப்பில் உருவாகி வரும் படம் தனுசு ராசி நேயர்களே. இதில் ரெபா மோனிகா ஜான், டிகங்கனா சூர்யவன்சி, யோகிபாபு உள்ளிட்டோர் முக்கிய கதாபாத்திரங்களில் நடித்துள்ளனர். நேற்று இப்படத்தின் டீஸர் வெளியாகி ரசிகர்கள் மத்தியில் வரவேற்பை பெற்றுள்ளது. ஜிப்ரான் இசையமைத்துள்ள இப்படத்தை ஸ்ரீ கோகுலம் தயாரிப்பு நிறுவனம் தயாரித்துள்ளது.

இப்படம் குறித்து சஞ்சய் பாரதி கூறுகையில், ராசியை நம்பும் ஒரு இளைஞன் வாழ்வில் ஏற்படும் பிரச்சனைகளை அதிரடி சம்பவங்களோடு குடும்பங்கள் கொண்டாடும் காமெடிப் படமாக எடுத்துள்ளோம். தனது ராசிக்கேற்ற பெண்ணை திருமணம் செய்ய தேடுவதுதான் கதை. இது நடிகர் தனுஷை மையமாக வைத்து எழுதவில்லை. முதலிலேயே ஹரீஷைத்தான் அணுகினோம். எதிர்வீட்டுப் பையன் மாதிரி ஒரு ஆள் தான் ஹரீஷ்.

படத்தின் டீஸரை பார்த்து அடல்ட் காமெடி என்கிறார்கள். ஆனால் இது கண்டிப்பாக அடல்ட் காமெடி படம் கிடையாது. படம் பார்க்கும் போது உங்களுக்குத் தெரியும். டிகாங்கனா, ரெபா மோனிகா இருவரும் நாயகியாக நன்றாக நடித்துள்ளனர். ஜிப்ரான் இசையில் 5 பாடல்கள் படத்தில் இருக்கிறது. ஒவ்வொன்றும் வேறு மாதிரி இருக்கும். தற்போது படத்தின் இறுதிகட்ட பணிகள் நடைபெற்றுக் கொண்டிருக்கிறது. விரைவில் திரையில் சந்திபோம் என்றார்.