சென்னை: அதர்வா நடித்துள்ள 'குருதி ஆட்டம்' படத்துக்குத் தடைவிதிக்கக் கோரி சென்னை உயர் நீதிமன்றத்தில் வழக்குத் தொடரப்பட்டுள்ளது. இது தொடர்பாக பிளையிங் ஹார்ஸ் பிக்சர்ஸ் என்ற தயாரிப்பு நிறுவனம் தாக்கல்செய்த மனுவில், “எங்கள் நிறுவனம் தயாரித்த இரண்டாம் குத்து என்ற திரைப்படத்தின் விநியோக உரிமையை, ராக் ஃபோர்ட் என்டர்டெயின்மென்ட் நிறுவனம், நான்கு கோடியே 85 லட்சம் ரூபாய்க்கு வாங்கியது.
இதில், இரண்டு கோடியே 85 லட்சம் ரூபாயை கொடுத்த ராக்ஃபோர்ட் நிறுவனம், மீதமுள்ள இரண்டு கோடி ரூபாயை வழங்கவில்லை. அதற்குப் பதிலாக விநியோக உரிமையைத் திருப்பித் தருவதாகவும், படத்தின் லாபத்தில் 40 விழுக்காட்டைத் தரும்படியும், இழப்பு ஏற்பாட்டால் மீதமுள்ள தொகையை திரும்பித் தருவதாகவும் ஒப்பந்தம் செய்யப்பட்டது.
படத்தால் ஏற்பட்ட இழப்பு ஒரு கோடியே 40 லட்சம் ரூபாயை வழங்க வேண்டிய நிலையில், ராக் ஃபோர்ட் தயாரிப்பில் அதர்வா நடிப்பில் ஸ்ரீ கணேஷ் இயக்கத்தில் 'குருதி ஆட்டம்' என்ற படத்தை வெளியிட உள்ளதாக பத்திரிகை, விளம்பரங்கள் மூலமாகத் தெரியவந்தது.
அதனால் எங்களுக்குத் தர வேண்டிய ஒரு கோடியே 40 லட்சம் ரூபாயை ஆண்டுக்கு 24 விழுக்காடு வட்டியுடன், ஒரு கோடியே 94 லட்சம் ரூபாயை வழங்காமல் குருதி ஆட்டம் படத்தை வெளியிடத் தடைவிதிக்க வேண்டும்” எனத் தெரிவிக்கப்பட்டிருந்தது.
இந்த வழக்கு நீதிபதி பரத சக்கரவர்த்தி முன்பு விசாரணைக்கு வந்தபோது, ராக் ஃபோர்ட் நிறுவனம் சார்பில் படத்தை தற்போது வெளியிட மாட்டோம் என உத்தரவாதம் அளிக்கப்பட்டதையடுத்து, விசாரணையை ஜனவரி 3ஆம் தேதிக்கு ஒத்திவைத்து உத்தரவிடப்பட்டது.
