பிக்பாஸ் 5ஆவது சீசன் தொடங்கி நேற்றுடன் (அக்டோபர் 7) மூன்று நாள்கள் நிறைவடைந்துவிட்டன. போட்டியாளர்களுக்கு முதல் டாஸ்க்காக தங்களை அறிமுகம் செய்துகொள்ளும் டாஸ்க் கொடுக்கப்பட்டுள்ளது. இதுவரை இசைவாணி, இமான் அண்ணாச்சி, சின்ன பொண்ணு ஆகியோர் தங்களது டாஸ்க்கை முடித்தனர்.
சரி வாங்க நேற்றைய எபிசோட்டில் என்ன நடந்து என்பதைப் பார்க்கலாம்...
'காத்துவாக்குல ரெண்டு காதல்' படத்திலுள்ள டூ டூ டூ பாடலோடு நேற்றைய எபிசோட்டில் பிக்பாஸ் நான்காவது நாள் தொடங்கியது. ஆளுக்கு ஒவ்வொரு மூலையில் நடனமாடி தங்களது நாளைத் தொடங்குகின்றனர்.
அபிஷேக் குழந்தைபோல் குடுமி போட்டுக்கொண்டுவருகிறார். அவரைப் பார்த்தவுடன் சின்ன பொண்ணு விபூதி வைக்க, உடனே அபிஷேக் காலில் விழுந்து ஆசிர்வாதம் வாங்குகிறார். (இதனைப் பார்த்த நெட்டிசன்கள்... வடிவேலுவின் மிடில் கிளாஸ் மாதவன் படத்தில் காலைப்பொழுதில் அவர் அம்மா காலில் விழுந்துவிட்டு, இரவு அம்மாவை அடிக்கும் காட்சியைப் போட்டு கலாய்த்தனர்)
பாவனியைக் கலாய்க்கும் அபிஷேக்
பாவனிக்கு 33 வயது ஆகுது, அதனால் அவர் வெளியே வந்தவுடன் கல்லூரி மாணவர்கள் யாரும் காதலிப்பதாகச் சொல்லக் கூடாது என அபிஷேக் கூறுகிறார்.
நமீதா அனுபவித்த வலிகள்
உண்மையான கதை சொல்லு டாஸ்க் நேற்றுதான் ஆரம்பித்தது என்றே சொல்லாம். ஆம்... நமீதா, தான் திருநங்கையாக மாறுவதில் தொடங்கித் தற்போது வரை எப்படிப் பயணிக்கிறேன் என்பதைத் தொடர்ந்து 20 நிமிடம் விவரித்தார். கண்கள் முழுவதும் கண்ணீர் வைத்துக்கொண்டு அவர் விவரிக்கும்விதம் கண்டிப்பாகப் பார்வையாளர்களின் கண்களில் கண்ணீர் வரவைத்திருக்கும்.
பயம், பாதுகாப்பின்மை, யாரை நம்புவது எனத் தெரியாமல் அவர் அனுபவித்த வலிகளைத் தெரிவித்தார். அதுமட்டுமின்றி மனநல காப்பகத்தில் மூன்று மாதங்கள் தங்கியதும், அங்குள்ள கம்பிகளைக் கையால் இரண்டு மாதமாகக் கழற்றி பின்னர் முயற்சி செய்து தப்பித்ததும் குறித்துப் பேசினார்.
எந்தக் குடும்பத்தால் தான் ஒதுக்கப்பட்டேனோ, அதே குடும்பத்தின் முன் ஒரு பெண்ணாக வாழ்ந்து முன்னேறிவருவதாக நமீதா மிகவும் பெருமையாகக் குறிப்பிடுகிறார். இதைக் கேட்ட சகப் போட்டியாளர்கள் அனைவரும் கண்ணீருடன் கைத்தட்டினர்.
இந்த 106 நாள் பிக்பாஸில், எங்களின் உரிமைகளையும், கோரிக்கைகளையும் அனைவரிடத்திலும் கேட்பேன் என மிக உணர்ச்சிகரமாகத் தெரிவித்தார் நமீதா. இவரின் வாழ்க்கைப் போராட்டத்தைக் கேட்ட மற்ற போட்டியாளர்கள் அனைவரும் எழுந்துநின்று கைத்தட்டி இதயம் எமோஜியை அவருக்கு ஒட்டினார்கள். போட்டியாளர்கள் மட்டுமல்ல; பார்வையாளர்களும் நமீதாவிற்கு சல்யூட் அடித்திருப்பார்கள். அந்த அளவிற்கு அவரின் வாழ்க்கைப் பயணம் மிகவும் துயரமாக இருந்தது.
நக்கல் கலந்த சிரிப்பில் பிரியங்கா
பிரியங்கா மேக்கப் போடுவதைப் பார்த்து தாமரை செல்வி ஆசையாக எனக்கு ஒருநாள் மேக்கப் போட்டுவிடு, நாங்களும் அழகாகத் தெரிய வேண்டும் எனக் கேட்கிறார். அதற்கு பிரியங்கா, "எனக்கு அடுத்தவர்களுக்குப் போட தெரியாது. ஆனால் போட்டுவிட ஆசை இருக்கிறது" என நக்கல் கலந்த சிரிப்போடு கூறினார். அவர் மேக்கப் போடுவதை மிகவும் ஏகத்துடன் தாமரை செல்வி பார்ப்பதுபோல் அவர்களின் பகுதி முடிகிறது.
ராஜுவும், ஐக்கியின் காதலும்
ராஜுவுக்கும், ஐக்கிக்கும் ஒரு டாஸ்க் வைக்கிறார் இமான். ஊரடங்கு முடிந்தவுடன் காலணி கடையில் சந்திக்கும் காதலர்களைப் போல் அவர்களை நடிக்கச் சொல்கிறார். 'செருப்புத் திருட வந்திருக்கியா? என்றார் ராஜு.
ஏன் ராஜு உங்களுக்கு இந்தச் செருப்புதான் வேண்டுமா? என்றார் ஐக்கி. 'எனக்குச் செருப்பைவிட முக்கியமான பொறுப்புதான் நீ இருக்கியே' என்று சொல்கிறார் ராஜு. இவர்களது உரையாடல் பார்வையாளர்கள் மனத்தில் சிரியதாகப் புன்னைகையை உண்டாக்கியது.
தற்கொலை எண்ணம்
மீண்டும் மாலை கதை சொல்லு டாஸ்க் தொடங்குகிறது. ஐந்தாவது நபராக மதுமிதா தன் வாழ்க்கை கதையைச் சொல்ல ஆரம்பித்தார். ஒரு ரிலேஷன் ஷிப்பிலிருந்து வெளிவந்து, தற்கொலை செய்யும் எண்ணத்தில் தான் இருந்ததாகவும், பெற்றோர் நினைவுக்கு வந்ததால் அதிலிருந்து தான் எப்படி வெளியே வந்தேன் என்பது குறித்தும் உணர்வுப்பூர்வமாக விவரித்தார்.
கவலையில் பாவனி
பாவனி, மதுமிதாவிடம் தன் கணவர் தற்கொலையால் உயிரிழந்தபிறகு, வாழ்க்கைக்கான நம்பிக்கை இன்றி இருக்கிறேன் என்றார். பிறகு தான் எதையோ மறைப்பதாக அபினய் நினைப்பதாக பாவனி கூறுகிறார்.
ஆனால் அபினய், “நான் உங்கள தெரிஞ்சுக்கத்தான் நினைத்தேன். கஷ்டப்படுத்த எதுவும் நினைக்கவில்லை” என பாவனியை சமாதானப்படுத்தினார்.
இந்த எபிசோட் மூலம் ஒரு நபர் தன் வாழ்க்கையில் எவ்வளவு சிரமமான கட்டங்களைத் தாண்டி மேலே வந்து நிற்கிறார் என்பதை நம்மால் புரிந்துகொள்ள முடிகிறது.
இதையும் படிங்க: பிக்பாசில் வெடித்தது மோதல் - இமான் அண்ணாச்சி தான் காரணமா?
