இந்தி, தெலுங்கு, மராத்தி ஆகிய மொழிகளில் மக்களின் கவனத்தை ஈர்த்த பிக்பாஸ் நிகழ்ச்சி 2017ஆம் ஆண்டு தமிழில் அறிமுகமானது. பிரபல தனியார் தொலைக்காட்சியில் ஒளிபரப்பான இந்த நிகழ்ச்சியை பலதரப்பட்ட ரசிகர்களையும் தாண்டி குடும்பப் பெண்களும் ரசிக்க ஆரம்பித்தனர். கமல்ஹாசன் தொகுத்து வழங்கிய இந்த நிகழ்ச்சி செம ஹிட்டானது.
இந்த நிகழ்ச்சியில் பங்குபெற்ற போட்டியாளர்களும் பிரபலமாகினர். எந்தவித வெளித்தொடர்பு இல்லாமல் ஒரே வீட்டில் 100 நாட்கள் இருக்க வேண்டும். அதுதான் இந்த நிகழ்ச்சியின் சிறப்பம்சம். மேலும் பிக்பாஸ் வீட்டில் கொடுக்கப்படும் டாஸ்க்குகளை முடித்து காட்டினால் அவரே வெற்றியாளர். ரகசியமாக பேசக் கூடாது. என பல அலப்பரைகள் உண்டு.
பிக்பாஸ், பிக்பாஸ்-2வைத் தொடர்ந்து பிக்பாஸ் மூன்றாவது பாகம் இன்று இரவு எட்டு மணிக்கு தொடங்குகிறது. பிக்பாஸ் மூன்றாவது பாகத்தையும் கமல்ஹாசனே தொகுத்து வழங்குகிறார். முன்பு இருந்த இரண்டு பாகத்தை காட்டிலும் மிக பிரமாண்ட முறையில் மூன்றாவது பாகம் ஒளிபரப்பாகிறது.
இந்த நிகழ்ச்சியில் பங்குபெறும் 15 போட்டியாளர்களை கமல்ஹாசன் அறிமுகப்படுத்துவார். இதனால் ரசிகர்களிடையே பயங்கர எதிர்பார்ப்பை ஏற்படுத்தியுள்ளது. மேலும், கமல்ஹாசன் பிக்பாஸ் நிகழ்ச்சியின்போது எடுக்கப்பட்ட புகைப்படம் வலைதளத்தில் வெளியாகி வைரலாகிவருகிறது. அவரது கெட்டப்பும், அவர் அமர்ந்திருக்கும் தோரணையும் பலரையும் வியக்க வைத்துள்ளது.
பிக்பாஸ் மூன்றாவது பாகத்தில் இயக்குநர் சேரன், ராதாரவி, நடன இயக்குநர் சாண்டி ஆகியோர் பங்குபெறுவதாக செய்திகள் வந்தவண்ணம் உள்ளன.
