தமிழில் அம்புலி, மாயை, விலாசம் உள்ளிட்ட பல படங்களில் முக்கியக் கதாபாத்திரத்தில் நடித்தவர் சனம் ஷெட்டி. இவர் தமிழ் மட்டுமல்லாது மலையாளத்திலும் நடித்துள்ளார். மேலும் கமல் ஹாசன் தொகுத்து வழங்கும் பிக்பாஸ் நிகழ்ச்சியில் பங்கேற்றதன் மூலம் தமிழ் ரசிகர்களிடையே சனம் ஷெட்டி மிகவும் பிரபலமானார்.
இந்நிலையில், தனது வாட்ஸ் -ஆப், இன்ஸ்டாகிராம் போன்ற சமூகவலைதளப் பக்கங்களில் அடையாளம் தெரியாத நபர்கள் ஆபாசக் குறுச்செய்திகள், படங்கள் அனுப்புவதாக அடையாறு சைபர் கிரைம் காவல் துறையினரிடம் சனம் புகார் அளித்துள்ளார். ஆபாசக் குறுஞ்செய்திகள் வந்த வாட்ஸ்-ஆப் எண்ணையும், இன்ஸ்டாகிராம் பக்கத்தையும், இதர ஆதாரங்களையும் அவர் காவல் துறையினரிடம் வழங்கினார்.
இதனையடுத்து சைபர் கிரைம் காவல் துறையினர் சனம் ஷெட்டி அளித்த புகாரின் அடிப்படையில், வழக்குப்பதிவு செய்து விசாரணையைத் தொடங்கியுள்ளனர். பிக்பாஸ் நிகழ்ச்சி புகழ் தர்ஷன், முன்னதாக தன்னை திருமணம் செய்து கொள்வதாகக் கூறி ஏமாற்றிவிட்டதாக காவல் ஆணையர் அலுவலகத்தில் சனம் புகார் அளித்தது குறிப்பிடத்தக்கது.
இதையும் படிங்க: பிக்பாஸ் பிரபலம் தர்ஷன் மீது சனம் ஷெட்டி போலீஸ் புகார்!
