மதுரை: காதலிக்க வற்புறுத்தி இளம்பெண்ணை, இளைஞர் ஒருவர் அவர் பணி செய்யும் இடத்திற்கேச் சென்று சரமரியாக தாக்கியுள்ளார். பின்னர், அதுதொடர்பான சிசிடிவி காட்சிகள் அண்மையில் வெளியாகி பெரும் பரபரப்பை ஏற்படுத்தியது. இந்நிலையில், இச்சம்பவத்தில் ஈடுபட்ட இளைஞர் மற்றும் அவரது நண்பரை போலீசார் கைது செய்து விசாரணை மேற்கொண்டு வருகின்றனர்.
அந்த விசாரணையில், மதுரை ஒத்தக்கடை அருகே சக்கரா நகர் பகுதியில் உள்ள தனியார் ஜெராக்ஸ் கடையில் பணி செய்து வருபவர் லாவண்யா (22). இவர், பள்ளியில் படிக்கும் சமயத்தில் சித்திக்ராஜா (25) என்பவருடன் நட்பாக பழகி வந்துள்ளார். இந்நிலையில், சித்திக்ராஜா லாவண்யாவை தன்னை காதலிக்க வற்புறுத்தி தொந்தரவு செய்து வந்ததாகக் கூறப்படுகிறது.
அதனால், இருவருக்கும் ஏற்பட்ட கருத்து வேறுபாடு காரணமாக கடந்த 5 மாதங்களாக சித்திக்ராஜாவுடன், லாவண்யா பேசுவதை தவிர்த்து வந்துள்ளார். ஆனால், சித்திக்ராஜா லாவண்யாவிற்கு தொலைபேசியில் தொடர்பு கொண்டு தொடர்ச்சியாக மன ரீதியாக தொல்லை கொடுத்து வந்ததாகவும் கூறப்படுகிறது.
இந்த நிலையில், கடந்த நவ.17ஆம் தேதி லாவண்யா ஜெராக்ஸ் கடையில் பணியாற்றிக் கொண்டிருந்தபோது, சித்திக்ராஜா தனது நண்பருடன் வந்து காதலிக்க வற்புறுத்தி வாக்குவாதத்தில் ஈடுபட்டுள்ளார். ஆனால், அதற்கு லாவண்யா மறுப்பு தெரிவித்ததால், கோபமடைந்த சித்திக் லாவண்யாவை கடுமையாக தாக்கியுள்ளார். அந்த தாக்குதலில், மயக்கமடைந்த லாவண்யாவை அக்கம் பக்கத்தில் இருந்தோர் மீட்டு மதுரை அரசு இராசாசி மருத்துவமனைக்கு சிகிச்சைக்காக அழைத்து சென்றனர். பின்னர், இந்த தாக்குதல் குறித்த சிசிடிவி காட்சிகள் வெளியாகி பரபரப்பை ஏற்படுத்தியது.
இதையும் படிங்க: "தமிழ்நாட்டில் யாரும் தனித்து நின்று ஆட்சி அமைக்க முடியாது" -செல்வப்பெருந்தகை!
இச்சம்பவம் குறித்து தகவலறிந்த ஒத்தக்கடை போலீசார் வழக்குப் பதிவு செய்து, சிசிடிவி காட்சிகளின் அடிப்படையில் விசாரணை மேற்கொண்டு வந்தனர். இந்நிலையில், இளம்பெண்ணை சரமாரியாக தாக்கிய ஒத்தக்கடையைச் சேர்ந்த சித்திக்ராஜா மற்றும் அவரது நண்பர் டெம்போ ராஜா ஆகிய இருவரையும் ஒத்தக்கடை போலீசார் கைது செய்துள்ளனர்.
அதைத் தொடர்ந்து அவர்களிடம் நடத்திய விசாரணையின் போது, தப்பிக்க முயன்ற சித்திக்ராஜா தவறி விழுந்ததால் அவருக்கு கை முறிந்துள்ளதாகவும், பின்னர் சிகிச்சைக்காக மருத்துவமனையில் அனுமதிக்கப்பட்டு நீதிமன்றத்தில் ஆஜப்படுத்தி, தற்போது சிறையில் அடைக்கப்பட்டுள்ளார் என போலீசார் தெரிவித்துள்ளனர்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
