நடிகர் பிரித்விராஜ் இயக்கத்தில் மோகன்லால் நடித்திருக்கும் படம் லூசிபர். தனது நடிப்பால் ரசிகர்களை கவர்ந்த பிரித்விராஜ், லூசிபர் படத்தின் மூலம் முதன்முறையாக இயக்குநர் அவதாரம் எடுத்திருக்கிறார். இப்படத்தில் மஞ்சு வாரியர், இந்திரஜித் குமாரன் ஆகியோர் நடித்துள்ளனர். ஒரு நடிகர் இயக்கும் படத்தில், துணிச்சலுடன் மலையாள சினிமாவின் முன்னணி நடிகரான மோகனலால் கதாநாயகனாக நடித்திருப்பது சினிமா பிரபலங்களிடையே ஆச்சர்யத்தை ஏற்படுத்தியுள்ளது.
அதே நேரத்தில், லூசிபர் படத்தின் ட்ரெய்லர் நாளை வெளியாகவுள்ளது ரசிகர்கள் மத்தியில் பெரிய எதிர்பார்ப்பை ஏற்படுத்தியுள்ளது. மிகப்பெரிய பட்ஜெட்டில் உருவாகியிருக்கும் இப்படம் மிகவும் சிறப்பு வாய்ந்ததாக கருதப்படுகிறது. இந்நிலையில் லூசிபர் படத்தின் ட்ரெய்லர் வெளியாகும் அதே நாளில், மெகாஸ்டார் மம்மூட்டி நடித்துள்ள மதுர ராஜா படத்தின் டீசரும் வெளியாகவிருப்பது ரசிகர்களின் கவனத்தை ஈர்த்து வருகிறது.
புலிமுருகன் படத்தை இயக்கிய வைசாக்-தான் மதுர ராஜா படத்தையும் இயக்கியுள்ளார். முன்னதாக இவர்களது கூட்டணியில் உருவான போக்கிரி ராஜா படத்தின் இரண்டாம் பாகம்தான் மதுர ராஜாவாகும். மலையாள சினிமாவில் அறிமுகமாகும் தமிழ் நடிகர் ஜெய், இந்தப்படத்தில் மம்மூட்டிக்கு தம்பியாக நடிக்கிறார்.
ஒரே நாளில் இரண்டு மாஸ் ஹீரோக்கள் நடித்துள்ள படத்தின் டீசர் மற்றும் டிரைலர் வெளியாவது மலையாள சினிமாவிற்கு கிடைத்த வரப்பிரசாதம் என ரசிகர்கள் மரண வெயிட்டிங்கில் இருக்கின்றனர்.
மதுர ராஜா படத்தின் டீசர் மாலை ஆறு மணிக்கும் லூசிபர் பட ட்ரெய்லர் ஒன்பது மணிக்கும் ரிலீஸ் ஆகிறது. பிரித்விராஜ் இயக்கியுள்ள லூசிபர் திரைப்படம் வரும் 28ஆம் தேதி வெளியாகவுள்ளது.
