சமீபத்தில் அமேசான் பிரைம் ஓடிடி தளத்தில் வெளியான 'சார்பட்டா' திரைப்படத்தில் வரும் முக்கியக் கதாபாத்திரங்களுள் ஒன்று 'டான்ஸிங் ரோஸ்'. இத்திரைப்படத்தைக் கண்ட அனைத்து தரப்பினர் மனதிலும் ஆழத் தடம் பதித்துச் சென்றிருக்கிறது 'டான்ஸிங் ரோஸ்' கதாபாத்திரம்.
வடசென்னை வட்டார வழக்கு, அசராத உடல்மொழி, திமிரான நடவடிக்கை என இமைகொட்ட விடாமல் திரைப்படத்தைக் காண வைக்கிறது இந்த கதாபாத்திரம்.
முற்றிலும் முரண்
'டான்ஸிங் ரோஸ்' கதாபாத்திரத்தில் கனகச்சிதமாக நடித்து, காண்போர் மனதை கொள்ளையடித்துச் சென்ற ஷபீர் கல்லரக்கல்லின் நிஜ வாழ்க்கை, இதற்கு முற்றிலும் முரணானது.
நிஜ வாழ்க்கையில் மிளிரும் ஷபீரின் தன்னம்பிக்கையும், லட்சியமும் மட்டும் படத்திலும் அச்சுப்பிசகாமல் செதுக்கப்பட்டுள்ளது. ஷபீர் திரைத்துறைக்கு புதிதானவர் அல்ல, 2014ஆம் ஆண்டில் வெளியான "நெருங்கி வா முத்தமிடாதே" படம் மூலம் திரைத்துறையில் பிரவேசித்தார்.
2016ஆம் ஆண்டு வெளியான 54321 படத்தில் நடித்து, தன் திறமையை உலகறியச் செய்தார். தொடர்ந்து பேட்ட, டெடி, அடங்கமறு உள்ளிட்ட திரைப்படங்களில் துணைக் கதாப்பாத்திரங்களிலும் நடித்துள்ளார். தற்போது டான்ஸிங் ரோஸாக, திரை பயணத்தின் அடுத்த கட்டத்தை எட்டிப் பிடித்துவிட்டார்.
திரும்பும் திசையெல்லாம் டான்ஸிங் ரோஸ்
இணையம் முழுவதும் யூடியூபர்களால் மெருகேற்றி பதிவிடப்பட்ட டான்ஸிங் ரோஸ் காணொலிகள் நிரம்பி வழிகின்றன. வாட்ஸ் அப் ஸ்டேட்டஸில் டான்ஸிங் ரோஸ் காணொலிகளை வைக்காதவர்களை விரல்விட்டே எண்ணிவிடலாம்.
திரும்பும் திசையெல்லாம் டான்ஸிங் ரோஸ் கதாபாத்திர புகழ் காட்டுத்தீயாய் பற்றி எரிகிறது.
இந்த அத்தனை புகழையும் கொண்டாடித் தீர்க்க வேண்டிய ஷபீரோ, அமைதி தோய்ந்த முகத்துடன், அனைத்து புகழும் இயக்குநர் பா. ரஞ்சித்தையே சாரும் என விரல்சுட்டிக்காட்டி தன்னடக்கத்தால் மேலும் மிளிர்கிறார்.
ரோஸ் உருவாகக் காரணம் நசீம் ஹமீத்
இதுகுறித்து பேசிய ஷபீர், "இயக்குநர் பா. ரஞ்சித், இந்த கதாபாத்திரத்திற்கு என்னைத் தேர்ந்தெடுக்காமல் இருந்திருந்தால், இத்தனை புகழும் எனக்கு எட்டாக்கனியாகவே இருந்திருக்கும். படத்தில் வரும் ஒவ்வொரு பாக்ஸர் கதாபாத்திரமும், தனி ஸ்டைலுடன் நிஜத்தில் வாழ்ந்த புகழ் மிகு பாக்ஸர்களை மையப்படுத்தியே உருவாக்கப்பட்டது.
ஆர்யாவின் கபிலன் பாத்திரம் 'முகம்மது அலி'யை மையப்படுத்தியது, மைக் டைசனுக்கான அர்ப்பணிப்புடன் உருவாக்கப்பட்டதுதான் வேம்புலி பாத்திரம். என்னுடைய டான்ஸிங் ரோஸ் கதாபாத்திரம், இங்கிலாந்தைச் சேர்ந்த புகழ்மிகு பாக்ஸர் நசீம் ஹமீத்தை மையப்படுத்தியே உருவானது.
நசீம் ஹமீத்தின் பாக்ஸிங் ஸ்டைல் நடனமாடுவது போலவே இருக்கும். தனது கால் அசைவுகளுக்காகவே பெரும் புகழைப் பெற்றவர் நசீம் ஹமீத். திரைப்படத்துக்காக நான் அவரது குத்துச்சண்டை காணொலிகளை தொடர்ந்து பார்த்து, அவரது உடல்மொழியை எனக்குள் புகுத்திக் கொண்டேன்” என்கிறார்.
முழுபடைப்பு சுதந்திரம் அளித்த இயக்குநர்
ரசிகர்களிடம் அதீத வரவேற்பைப் பெற்று, தனக்கு புகழ் மகுடத்தை சூட்டிய டான்ஸிங் ரோஸ் கதாபாத்திரத்துக்கு தயாரானது குறித்தும் ஷபீர் கல்லரக்கல் மனம் திறக்காமல் இல்லை.
தான் தயாரான முறை குறித்து பேசிய ஷபீர், "இந்த திரைப்படத்தில் கடைசி நிமிடத்தில் பங்கேற்றதால், 2 மாத நடிப்பு, குத்துச்சண்டை பயிற்சிகளை தவறவிட்டுவிட்டு நேராக படப்பிடிப்பிலேயே கலந்துகொண்டேன்.
இயக்குநர் பா.ரஞ்சித், ஸ்டண்ட் மாஸ்டர் அன்பறிவு இருவரும் எனது யோசனைகளின்படி செயல்பட அனுமதித்து, முழு படைப்பு சுதந்திரத்தையும் அளித்தனர். டான்சிங் ரோஸ் கதாபாத்திரத்துக்கு உயிர் கொடுக்க, அது எனக்கு பேருதவியாக இருந்தது" என்றார்.
புன்னகையை விதைக்கும் ஷபீர்
மட்டற்ற போதை தரும் புகழை ருசித்தபோதும், எந்த சூழ்நிலையிலும் தன்னடக்கத்தை தவறவிடாது பார்த்துக் கொள்கிறார் ஷபீர். இவர் சிலம்பத்தில் காலடி குத்து வரிசை, கிக் பாக்ஸிங், முவாய் தாய், பார்கூர், களரி போன்ற தற்காப்பு கலைகளில் பயிற்சி பெற்றிருக்கிறார்.
ஜெயந்தி மாஸ்டர், பிளாக் ஸ்வான் டான்ஸ் அகாடமி ஆகியோரிடமும் நடன வகுப்புகளை கற்றுத் தேர்ந்துள்ளார். அது மட்டுமல்லாமல் மலையேற்றத்திலும், கடல் சறுக்கு விளையாட்டிலும் ஈடுபாடு மிகுந்தவர்.
அனைத்துக்கும் அப்பாற்பட்டு தி லிட்டில் தியேட்டரில் பெற்ற நடிப்பு, காமெடி பயிற்சிகளால், மருத்துவமனைகளில் சிகிச்சை பெற்று வரும் பல நோயாளிகளின் முகத்தில், தனது நடிப்பின் மூலம் புன்னகையை விதைத்து வருகிறார்.
திரைத்துறைக்கு கிடைத்த மற்றொரு முத்து
டான்ஸிங் ரோஸ் கதாபாத்திரத்தால் கிடைத்த ஷபீர், தமிழ் திரைத்துறைக்கு கிடைத்துள்ள மற்றொரு முத்து. சரியாக பயன்படுத்திக் கொள்ளப்படும் பட்சத்தில், ஷபீரின் சாகசம் திரைத்துறையில் தொடரும் என்பதில் எள்ளளவும் ஐயமில்லை.
டான்ஸிங் ரோஸ் ஆட்டம் இனி ஆரம்பம்!
இதையும் படிங்க: ஷூட்டிங் ஸ்பாட் சுவாரஸ்யங்களை பகிர்ந்து கொண்ட ‘சார்பட்டா’ மாரியம்மா
