ஸ்ரீ கோகுலம் மூவீஸ் தயாரிப்பில், சஞ்சய் பாரதி இயக்கத்தில் ஹரீஷ் கல்யாண் நடிக்கும் புதிய படம் 'தனுசு ராசி நேயர்களே' என்று பெயரிடப்பட்டுள்ளது.
இப்படம் குறித்து அதன் இயக்குநர் சஞ்சய் பேசியபோது, "நம்மில் பலரும் கடுமையாக நம்பிக்கை கொண்டோ அல்லது வேடிக்கையாகவோ ராசியை கவனிப்பதுண்டு. பல ராசிகள் இருந்தாலும் தனுசு ராசிக்கார்களுக்கு ஒரு தனி சிறப்பு உண்டு. இந்த படத்திற்கு 'தனுசு ராசி நேயர்களே' என்று பெயரிடக் காரணம், மற்ற ராசிகளுடன் ஒப்பிடுகையில் அதிக கவனத்தை ஈர்க்கும் ராசி தனுசு ராசி. இப்படத்தின் கதாநாயகன் ஹரீஷ் கல்யாண், தனுசு ராசிக்காரர்தான்.
இந்த ராசிக்கான அடையாளம் ஒரு வில் அம்பு வைத்திருப்பவர். இது லட்சிய நோக்கத்ததை குறிக்கிறது. இதேபோல், இப்படத்தின் ஹீரோவும் ஒரு குறிக்கோளுடன் இருப்பவர்தான் என்பதை அவர் வாழ்க்கையில் தொடர்ச்சியாக நடைபெறும் சம்பவங்கள் வைத்து அறியும் வகையில் கதை அமைக்கப்பட்டுள்ளது. இந்த படத்தில் ஹரீஷ் கல்யாண்னுக்கு ஜோடியாக இரண்டு கதாநாயகிகள் நடிக்கவுள்ளனர், அவர்கள் யார் என்பது இன்னும் இறுதி செய்யப்படவில்லை. ஜிப்ரான் இந்த படத்திற்கு இசையமைக்கிறார், படக்குழுவில் இடம்பெறவுள்ள மற்ற நடிகர்கள், தொழில்நுட்ப கலைஞர்கள் குறித்து விரைவில் அறிவிக்கப்படும்" என்று கூறினார்.
