கேரளாவைப் பூர்விகமாகக் கொண்ட ஆர்யா தமிழில் 'அறிந்தும் அறியாமலும்' படத்தின் மூலம் என்ட்டிரி கொடுத்தார். நடிகர் பிரகாஷ் ராஜுக்கு மகனாகவும், கேங்ஸ்டராகவும் இதில் நடித்திருந்தார். இவர் நடித்த முதல் படமே விமர்சன ரீதியாகப் பாராட்டுகளைப் பெற்றது. அதிலும் படத்தில் இடம்பெற்றிருந்த 'தீப்பிடிக்க' பாடல் செம ஹிட்டடித்தது.
பின்பு அதே ஆண்டு வெளியான, 'உள்ளம் கேட்குமே', 'ஒரு கல்லூரியின் கதை' என்ற அடுத்தடுத்து வெளியான காதல் படம் மூலம் பெண்களின் மனத்தை வசியம்செய்து, கலாபக் காதலனாக ஜொலித்தார். அதிலிருந்து இவரை தமிழ் சினிமாவில் சாக்லேட் பாய் என்றே ரசிகர்கள் அழைக்க ஆரம்பித்துவிட்டனர்.
'ஒரு கல்லூரியின் கதை' படத்தில் நண்பர்களைப் பங்கு என அழைத்து புதிய ட்ரெண்டை உருவாக்கினார். நான் கடவுள், சிவா மனசுல சக்தி, பாஸ் (எ) பாஸ்கரன், அவன் இவன், மதராசபட்டினம் என 10 ஆண்டுகளில் 25 படங்களுக்கு மேல் நடித்து அசத்தியுள்ளார்.
ஆர்யாவும், சாயிஷாவும் 2018ஆம் ஆண்டு வெளியான கஜினிகாந்த் படத்தில் ஒன்றாக நடித்தபோது காதலிக்க ஆரம்பித்தனர். பின்பு அடுத்த ஆண்டே திருமணம் செய்துகொண்டனர். திருமணம் முடிந்த கையோடு இவர்கள் இருவரும் டெடி படத்தில் ஒன்றாக இணைந்து நடித்திருந்தனர்.
ஆர்யாவின் ஹிட் படங்கள்
- சார்பட்டா பரம்பரை
- பாஸ் (எ) பாஸ்கரன்
- ராஜா ராணி
- ஆரம்பம்
- அறிந்தும் அறியாமலும்
- உள்ளம் கேட்குமே
- மதராசபட்டினம்
- அவன் இவன்
- நான் கடவுள்
- மகாமுனி
- சிவா மனசுல சக்தி
ஆரம்பம் படத்திற்குப் பிறகு சுமார் ஏழு ஆண்டுகளுக்கு மேலாக பெரிய அளவில் படங்கள் ஆர்யாவுக்கு கைக்கொடுக்காத நிலையில், 2021இல் வெளியான சார்பட்டா பரம்பரை படம் மிகப்பெரிய ஹிட் கொடுத்தது. படத்திற்காகத் தனது உடலை மிகவும் சிரமப்பட்டு கச்சிதமாகக் குறைத்து, வெற்றிகண்டுள்ளார். கடைசியாக ஆர்யா - விஷால் நடிப்பில் சமீபத்தில் வெளியான எனிமி திரைப்படம் மாறுபட்ட கதைக்களத்தால் வெற்றியடைந்துள்ளது.
தமிழ் சினிமாவின் சாக்லேட் பாய் என அழைக்கப்படும் ஆர்யா இன்று (டிசம்பர் 11) தனது 41ஆவது பிறந்தநாளைக் கொண்டாடிவருகிறார். இதனை முன்னிட்டு ரசிகர்கள், திரையுலகப் பிரபலங்கள் சமூக வலைதளங்களில் வாழ்த்துத் தெரிவித்துவருகின்றனர்.
இதையும் படிங்க: நகைச்சுவை நடிகர் சிங்கமுத்து பிறந்தநாள்
