பாலிவுட் சூப்பர் ஸ்டார் ஆமிர்கான் அவரது இரண்டாவது மனைவி கிரண் ராவ் ஆகியோர் இணைந்து அறிக்கை ஒன்றை சமீபத்தில் வெளியிட்டனர்.
அதில், 'இந்த 15 ஆண்டுகளில் மகிழ்ச்சி, புன்னகை, சுக - துக்கம் ஆகியவற்றைப் பகிர்ந்து கொண்டோம்.
பரஸ்பர பிரிவு
எங்களின் உறவு நம்பிக்கை, மரியாதை மற்றும் அன்பால் வளர்ந்தது. நாங்கள் தற்போது வாழ்க்கையின் புதிய அத்தியாயத்தைத் தொடங்கத் திட்டமிட்டுள்ளோம்.
எங்களால் நீண்ட காலம் தம்பதியாக நீடிக்க முடியாது. ஆனால், ஒருவருக்கொருவர் நல்ல குடும்பமாக, குழந்தைக்கு பெற்றோராக இருப்போம்' எனத் தெரிவிக்கப்பட்டுள்ளது.
மேலும், 'சில காலத்திற்கு முன்பு நாங்கள் இது குறித்து திட்டமிட்டோம். தற்போது இது எங்களுக்குப் பயனுள்ளதாக மனப்பூர்வமாக அமையும்படி உள்ளது. எங்களின் மகன் ஆசாத்துக்கு அர்ப்பணிப்புள்ள ஒரு பெற்றோராக இருப்போம். நாங்கள் அவனை ஒன்றாக வளர்ப்போம்.
புதிய பயணத்தின் தொடக்கம்
திரைப்படங்கள், பானி அறக்கட்டளை என நாங்கள் தொடர்ந்து ஒன்றாகப் பணியாற்றுவோம். எங்கள் உறவில் ஏற்பட்ட இந்தப் பரிணாம வளர்ச்சியை புரிந்துகொண்ட குடும்பத்தினர் மற்றும் நண்பர்களின் தொடர்ச்சியான ஆதரவிற்கும், புரிதலுக்கும் எங்களது நன்றிகள்.
உங்களின் நல்வாழ்த்துகள் மற்றும் ஆசீர்வாதங்கள் எங்களுக்கு வேண்டும். எங்களைப் போலவே - இந்த விவகாரத்தை நீங்கள் ஒரு முடிவாக அல்ல, ஒரு புதிய பயணத்தின் தொடக்கமாகக் காண்பீர்கள் என்று நம்புகிறோம்' என இருவரும் அறிக்கையில் தெரிவித்துள்ளனர்.
இந்தப்பிரிவுக்கு பின் லடாக்கில், 'லால் சிங் சத்தா' படப்பிடிப்பில் இருந்த ஆமீர்கானுடன் கிரண் ராவ்வும் சேர்ந்து கொண்டு ரசிகர்களுக்கு நன்றி வீடியோ ஒன்றை இணைந்து வெளியிட்டுள்ளனர்.
அதில், 'குடும்ப வாழ்வில் இருந்து நாங்கள் விலகினாலும் திரைப்படங்கள், பானி அறக்கட்டளை என நாங்கள் தொடர்ந்து ஒன்றாகப் பணியாற்றுவோம். எங்கள் குழந்தைகளுக்கு நல்ல பெற்றோராக இருப்போம்' என்று தெரிவித்தனர்.
ரீனா தத்தா
ஆமீர்கானின் இரண்டாவது மனைவி கிரண் ராவ் ஆவார். முன்னதாக ஆமீர் கான் ரீனா தத்தாவை திருமணம் செய்திருந்தார்.
இவர்கள் இருவருக்கும் ஜூனைத் கான் என்ற மகனும் இரா கான் என்ற மகளும் உள்ளனர். இவர்கள் 2002ஆம் ஆண்டு பிரிந்தார்கள். அதன்பின்னர் ஆமீர்கான் கிரண் ராவைத் திருமணம் செய்து கொண்டார். கிரண் ராவ் - ஆமீர் கான் தம்பதியருக்கு ஆசாத் என்ற மகன் உள்ளார்.
இதையும் படிங்க: ஆமீர் கானின் 'லால் சிங் சத்தா' படப்பிடிப்பு மீண்டும் தொடக்கம்!
