தமிழில் தேரோடும் வீதியிலே படத்தில் நடித்தவர் பாயல் கோஷ். இவர் கடந்த சில நாள்களுக்கு முன் பாலிவுட் திரையுலகின் முன்னணி இயக்குநர்களில் ஒருவரான அனுராக் காஷ்யப், தன்னிடம் அத்தமீறியதாக பரபரப்பு குற்றச்சாட்டை முன்வைத்தார்.
இது குறித்து பாயல் கோஷ் கூறுகையில், "இந்தச் சம்பவம் 2014ஆம் ஆண்டு அவர் பாம்பே வெல்வெட் படத்தை இயக்கியபோது நடந்தது. அவரது அலுவலகத்துக்கு நான் பட வாய்ப்பு கேட்டு சென்றபோது அவர் என்னையே உற்றுப் பார்த்தார்.
அதன் பின் சில முறை அவர் அலுவலகங்களுக்கு வர சொன்னார். அவ்வாறு ஒரு முறை சென்றபோது அவர் குடித்திருந்தார். எதையோ புகைத்துக்கொண்டும் இருந்தார். அப்போது சோபாவில் அமர்ந்திருந்த என் மீது அவர் படுக்க முயன்றார். நான் விட்டு விடும்படி கெஞ்சினேன்.
அப்போது 200க்கும் மேற்பட்ட பெண்கள் தன்னுடன் படுக்கையை பகிர்ந்துள்ளனர் என்று பெருமையாக கூறினார். பின் ஒருவழியாக அவரது வீட்டிலிருந்து வெளியேறிவிட்டேன். இருப்பினும், அவர் மீண்டும் மீண்டும் பலமுறை என்னை அழைத்தார். நான் போகவில்லை" என்று தெரிவித்திருந்தார்.
இந்தச் சூழலில் அனுராக்கிற்கு ஆதரவாக பல்வேறு பாலிவுட் பிரபலங்கள் கருத்து தெரிவித்துவருகின்றனர். குறிப்பாக, அனுராக் காஷ்யப்பின் முன்னாள் மனைவிகள் ஆர்த்தி பஜாஜ், நடிகை கல்கி ஆகியோரும் அவருக்கு ஆதரவாக கருத்தை பதிவிட்டுள்ளனர்.
இந்நிலையில் நடிகை பாயல் கோஷ், "அவர் ஒரு நல்ல மனிதர் என்றால், அவரை காப்பாற்ற இவர்கள் முயல்கின்றனர் என்றால் பின் ஏன் அவரைவிட்டு பிரிந்தார்கள். ஒருவருக்கொருவர் நேசிக்கும், ஒருவருக்கொருவர் மரியாதை வைத்திருக்கும்போது ஏன் அவர்கள் விவாகரத்து பெற்றனர்.
அவரது இரண்டாவது மனைவி கல்கி அனுராக் காஷ்யப்புடன் இருந்ததைவிட இப்போதுதான் மிகவும் மகிழ்ச்சியாக இருக்கிறார். ஒன்றாக இருக்கும்போது அவர்கள் மகிழ்ச்சியாக இருந்திருந்தால் அவர்கள் ஏன் பிரிய வேண்டும்?
அவர் அவ்வளவு நல்ல மனிதர் என்றால் ஏன் அவரது இரண்டு மனைவிகளும் அவரை விட்டு பிரிந்தார்கள்" என்று கேள்வி எழுப்பினார்.
இதையும் படிங்க: இர்ஃபானின் கல்லறைக்குச் சென்று மரியாதை செலுத்திய பாலிவுட் நடிகர்
