இஸ்ரேலுக்கும் ஐக்கிய அரபு எமிரேட்ஸ் (UAE)-க்கும் இடையே ஆகஸ்ட் 13ஆம் தேதி கையெழுத்தான ஒப்பந்தம் வரலாற்றுச் சிறப்புமிக்கது. முழுமையான தூதரக உறவை மேற்கொள்வதற்கும், இரு தரப்பு உறவில் இயல்பு நிலை ஏற்படுவதற்கும் இது வழி வகுத்துள்ளது.
மேற்காசியாவில் இதுவரை நிலவிவந்த பதற்றத்தை தணிப்பதற்கான முதல் குறிப்பிடத்தக்க நடவடிக்கையாக இந்த ஒப்பந்தம் அமைந்துள்ளது.
அரபு – இஸ்ரேல் உறவில் ஏற்பட்டுள்ள இந்த திருப்புமுனை, மேற்காசிய பிராந்தியத்தில் இந்தியாவின் முக்கியத்துவம் அதிகரிப்பதற்கான வாய்ப்பை வழங்கியுள்ளது. 70 ஆண்டுகளுக்கும் மேலாக நீடித்து வரும் அரபு – இஸ்ரேல் இடையேயான கசப்புணர்வை போக்க இந்தியா முக்கிய பங்காற்றுவதற்கான வாய்ப்பை இது அளித்துள்ளது.
ஐக்கிய அரபு எமிரேட்ஸின் பட்டத்து இளவரசர் முகமது பின் சயீத் அல் நஹ்யான் மற்றும் இஸ்ரேலிய பிரதமர் பெஞ்சமின் நேதன்யாகு இடையே கையெழுத்தான இந்த ஒப்பந்தம் பல ஆண்டுகால முயற்சியின் பலன்.
இந்த ஒப்பந்தம் மேற்காசியாவின் மோதல் அரசியலுக்கு முற்றுப்புள்ளி வைப்பதற்கான சாத்தியக்கூறுகளை உள்ளடக்கியது. இந்த ஒப்பந்தத்தின் மூலம் அரபு நாடுகள் இஸ்ரேலை அங்கீகரிக்கும்.
இதன் தொடர்ச்சியாக, இஸ்ரேல் – பாலஸ்தீனம் இடையே பேச்சுவார்த்தை ஏற்படுவதை உறுதிப்படுத்த முடியும். பாலஸ்தீனம் என்ற தனி நாடு உருவாவதற்கான வாய்ப்பு தொலைவில் இருந்தாலும், அதற்கான பேச்சுவார்த்தை தொடங்கும் என எதிர்பார்க்கலாம்.
பாலஸ்தீனம் நாடு உருவாகும் என்றால் மட்டுமே, இதுபோன்ற ஒப்பந்தத்தை இஸ்ரேலுடன் மேற்கொள்வது பற்றி பரிசீலிப்போம் என ஐக்கிய அரபு எமிரேட்ஸின் நட்பு நாடான சவூதி அரேபியா தற்போது நிபந்தனை விதித்திருக்கிறது. எனினும், சவூதி அரேபியாவும், ஐக்கிய அரபு எமிரேட்ஸின் பாதையில் பயணிக்கும் என்பதில் சந்தேகம் இல்லை.
இந்த ஒப்பந்தம் பாலஸ்தீன ஆட்சியாளர்களுக்கு பெருத்த ஏமாற்றத்தை ஏற்படுத்தத்தான் செய்யும். பாலஸ்தீனப் பிரச்னைக்கு அப்பாற்பட்டு பல பத்தாண்டுகளுக்கு முன்பே எகிப்தும் ஜோர்டானும் இஸ்ரேலுடன் ஒப்பந்தம் ஏற்படுத்திக் கொண்டன. அந்த பாதையில், தற்போது மற்றொரு முக்கிய அரபு நாடும் பயணித்துள்ளது.
கடந்த 2017ஆம் ஆண்டு ஜூலையில் பிரதமர் நரேந்திர மோடி இஸ்ரேல் சென்றார். இஸ்ரேல் சென்ற முதல் இந்திய பிரதமர் என்ற பெயரை அவர் பெற்றார். அந்த பயணத்தின்போது, இஸ்ரேல் – பாலஸ்தீனத்திற்கு இடையே நல்லிணக்கம் ஏற்படுவதற்கான முயற்சிகளையும் அவர் மேற்கொண்டார். அவர் அப்போது பாலஸ்தீனம் செல்லவில்லை.
எனினும், இஸ்ரேல் – பாலஸ்தீனம் இரண்டுக்கும் நம்பிக்கை அளிக்கும் இந்தியாவின் கொள்கை அப்போது உறுதிப்படுத்தப்பட்டது. 1992இல் இருந்து இஸ்ரேலுடன் இந்தியா தூதரக உறவுகளை கொண்டுள்ள போதிலும், பாலஸ்தீனத்திற்கும் நம்பிக்கைக்குரிய நாடாக இந்தியா தன்னை முன்னிருத்தியது.
தனக்கு ஆதரவாக உள்ள நாடுகளிடம் இருந்து தன்னை ஓரம்கட்டும் முயற்சியாகவே இஸ்ரேல் – ஐக்கிய அரபு எமிரேட்ஸ் ஒப்பந்தத்தை பார்க்கிறது பாலஸ்தீனம். எனினும், இஸ்ரேலுக்கும் அரபு நாடுகளுக்கும் இடையே அமைதியை ஏற்படுத்துவதில் கடந்த 26 ஆண்டுகளில் மேற்கொள்ளப்பட்ட மிக முக்கிய நடவடிக்கை இது என தெரிவித்துள்ளார் இஸ்ரேல் பிரதமர் பெஞ்சமின் நேதன்யாகு.
மற்றொரு முக்கிய நடவடிக்கையாக, மேற்கு கரையில் புதிய குடியிருப்புகளை அமைத்து அதனை இணைத்துக் கொள்வதற்கான முயற்சியை தற்போது நிறுத்திவைத்துள்ளது இஸ்ரேல்.
இஸ்ரேல் – ஐக்கிய அரபு எமிரேட்ஸ் இடையேயான புதிய ஒப்பந்தம், பிராந்திய மற்றும் வளைகுடா பகுதியின் பாதுகாப்புக்கும், நிலைத்தன்மைக்கும் முக்கிய பங்காற்ற இந்தியாவுக்கு ஒரு புதிய வாய்ப்பை வழங்கியுள்ளது. இந்தியா இஸ்ரேலுடன் மட்டும் நெருங்கி இருக்கவில்லை.
வளைகுடாவில் உள்ள அரபு நாடுகளுடன் குறிப்பாக ஐக்கிய அரபு எமிரேட்ஸ் மற்றும் சவூதி அரேபியாவுடன் இயற்கையான முறையில் உறவை வளர்த்தெடுத்திருக்கிறது. பாதுகாப்பு மற்றும் பொருளாதார ரீதியில் நெருங்கிச் செயல்படுவதற்கான முயற்சியில் மோடி அரசு பெற்றுள்ள முக்கிய வெற்றி இது.
இஸ்ரேல் – ஐக்கிய அரபு எமிரேட்ஸ் ஒப்பந்தத்திற்குப் பிறகான தனது சுதந்திர தின உரையில், வளைகுடா நாடுகளுடனான இந்தியாவின் ஆழமான உறவு குறித்தும், இந்தியாவின் எரிசக்தி தேவைக்கும் பாதுகாப்புக்கும் அவை அளித்து வரும் முக்கியத்துவம் குறித்தும் பேசினார் பிரதமர் நரேந்திர மோடி.
கோவிட்-19 பெருந்தொற்று காலத்திலும், தங்கள் நாட்டிலேயே இந்தியர்கள் இருக்க அனுமதித்ததற்காக ஐக்கிய அரபு எமிரேட்ஸ், சவூதி அரேபியா, கத்தார் ஆகியவற்றுக்கு பிரதமர் நன்றி தெரிவித்தார். இஸ்ரேல் – ஐக்கிய அரபு எமிரேட்ஸ் ஒப்பந்தத்தை ஆதரித்து, அது, பிராந்தியத்தின் அமைதிக்கு வழிவகுக்கும் என குறிப்பிட்டு தனி அறிக்கை வெளியிட்டது இந்தியா.
பாலஸ்தீனத்திற்கான இந்தியாவின் ஆதரவு நீண்டகாலமாக இருந்து வருவதை சுட்டிக்காட்டியுள்ள இந்தியா, இரு தரப்பும் ஏற்றுக்கொள்ளத் தக்க உடன்பாடு விரைவில் ஏற்படும் என்றும் நம்பிக்கை தெரிவித்துள்ளது.
இந்தியா, வளைகுடா நாடுகளுக்கு ஆயுதங்களையும், பாதுகாப்பு பயிர்சிகளையும், உளவு தகவல்களையும், பயங்கரவாத எதிர்ப்பு பயிற்சிகளையும் அளிக்க முடியும். இதன்மூலம், இந்திய பொருளாதாரத்தில் மறுமலர்ச்சியை ஏற்படுத்துவதோடு, பாதுகாப்பையும் வலுப்படுத்திக் கொள்ள முடியும். மேலும், எரிசக்தி பாதுகாப்பு மற்றும் உணவு பாதுகாப்பு விவகாரத்தில் ஒத்துழைப்பை வலுப்படுத்துவதன் மூலம், இந்திய உணவுப் பொருட்களுக்கான சந்தையை விரிவுபடுத்த முடியும்.
ஐக்கிய அரபு எமிரேட்ஸ், சவூதி அரேபியா போன்ற வளைகுடா நாடுகள் பாகிஸ்தானுக்கு மிகப் பெரிய அளவில் உதவக்கூடியவை. ஆனால், இஸ்லாமிய நாடுகளுக்கான கூட்டமைப்பு விவகாரம் காரணமாக, அந்த நாடுகளிடம் இருந்து பாகிஸ்தான் விலகி உள்ளது. இதுவும் இந்தியாவுக்கு மிகப்பெரிய சாதகத்தை அளிக்கும்.
அரபு நாடுகளுடன் மட்டுமல்லாது ஈரானுடனும் நல்ல நட்புறவை கொண்டிருக்கிறது இந்தியா. அந்த வகையில் இஸ்லாமிய உலகம், இந்தியாவுடன் ஒத்துழைப்பை மேம்படுத்திக் கொள்வதற்கு வாய்ப்புகள் அதிகரித்திருக்கின்றன.
இந்தியாவைப் பொருத்தவரை இந்த ஒப்பந்தம், ஒரு கடினமான காலகட்டத்தில் கிடைத்திருக்கக்கூடிய ஒரு வரம். இதன்மூலம், புவிசார் பொருளாதாரத்திலும், புவிசார் வெளியுறவு கொள்கையிலும் இந்தியா முக்கிய பங்காற்ற முடியும்.
இதையும் படிங்க: ஷின்ஷோ அபே காலத்தில் இந்திய - ஜப்பான் உறவு
