சமீபத்திய தொழில்நுட்ப முன்னேற்றங்களுடன், குற்றங்கள் மற்றும் அத்துமீறல்கள் தொடர்ந்து தடையில்லாமல் நடைபெற்று வருகிறது. ஆனால் நமது நீதித்துறை இன்னும் காலாவதியான நடைமுறைகளை பின்பற்றி, நாட்டில் நீதியை ஒரு கானல் நீராக மாற்றுகிறது. 2001ஆம் ஆண்டில் தெஹல்கா நடத்திய ஆபரேஷன் வெஸ்ட் எண்ட் என்ற ஒரு ரகசிய நடவடிக்கை இந்திய இராணுவத்தின் இருண்ட பக்கத்தையும், அப்போதைய ஆளும் தேசிய ஜனநாயக கூட்டணியின் இரகசிய பாதுகாப்பு ஒப்பந்தங்களையும் அம்பலப்படுத்தியது.
சமூக நீதி மையத்துடன் இணைந்து டாடா அறக்கட்டளைகள் தயாரித்த இந்திய நீதி அறிக்கை(2019)-ல் சட்ட விதிகளின் குறியீட்டில் 126 நாடுகளில் இந்தியா 68வது இடத்தில் உள்ளது என்பதை சுட்டிக்காட்டியது. வன்முறை அதிகரிப்பு காரணமாக இந்தியா மொத்த உள்நாட்டு உற்பத்தியில் 9 விழுக்காடு அளவிற்கு சேதம் ஏற்படுகிறது.
ஒவ்வொரு மத்திய பட்ஜெட்டிலும் பாதுகாப்புத் துறையை மிக முக்கியமாக அறிவிப்பது என்பது ஒவ்வொரு நிதி அமைச்சருக்கும் வழக்கமாகிவிட்டது. ஆனால் சிஏஜி அறிக்கைகள் குறைவான ஒதுக்கீடுகள் மற்றும் பரவலான ஊழல் பற்றிய வித்தியாசமான விமரிசனத்தை முன்வைக்கின்றன. 2001ஆம் ஆண்டில், இந்திய பத்திரிகையான தெஹெல்கா, வெஸ்ட் எண்ட் இன்டர்நேஷனல் என்ற லண்டனை தலைமையிடமாக கொண்ட ஒரு கற்பனையான ஆயுத உற்பத்தி நிறுவனத்தை உருவாக்கியது. அதன் புலனாய்வு பத்திரிகையாளர்கள் தாங்கள் வைத்திருக்கும் வெப்ப கேமராக்கள் மற்றும் பிற இராணுவ உபகரணங்களை விற்பனை செய்வதாக கூறி பல பாதுகாப்பு அதிகாரிகளுடன் தொடர்பு கொண்டனர்.
இந்த நடவடிக்கையை செயல்படுத்த தெஹெல்கா 10.8 லட்சம் வரை செலவிட்டது, அவற்றில் பெரும்பாலானவை அதிகாரிகள் மற்றும் அரசியல்வாதிகளுக்கு லஞ்சம் மற்றும் கமிஷன்களாக கொடுக்கப்பட்டது. அது இந்தியாவில் அரசியல் மற்றும் அதிகாரத்தில் இருப்பவர்களின் பேராசை மற்றும் தார்மீகமின்மை நிலையை அம்பலப்படுத்தியது.
பாதுகாப்புத்துறை ஒப்பந்தங்களை மேற்கொள்ளும்போது அதில் ஊழல் என்பது பொதுவானது என்று முன்னாள் பாதுகாப்பு அமைச்சர் முலாயம் சிங் யாதவ் ஒருமுறை கூறியிருந்தார். அதனை மெய்ப்பிக்கும் வகையில், பாஜக தலைவர் பங்காரு லட்சுமனை சந்திக்க மூத்த பிரிவு அதிகாரிக்கு லஞ்சம் கொடுத்து அதன் பின்னர் அப்போதைய பாதுகாப்பு மந்திரி ஜார்ஜ் பெர்னாண்டசை ஆபரேஷன் வெஸ்ட் எண்ட் குழுவினர் சந்தித்தனர்.
மார்ச் 2001-ல் வெளியிடப்பட்ட இந்த நடவடிக்கையின் வீடியோ குறுந்தகடுகள் அரசியல் புயலுக்கு வழிவகுத்தன. இந்த திட்டத்தைத் தொடர லட்சுமணன் ஒரு லட்சம் ரூபாயை பெற்றுக் கொள்ளும் காட்சி நாடு முழுவதும் அதிர்ச்சி அலைகளை அனுப்பியது. லஞ்சம் வாங்கிய தேசியத் தலைவர்களில் சமதா கட்சியின் பொருளாளர் ஜெயா ஜெட்லி மற்றும் ஆர்.கே.ஜெயின் ஆகியோர் அடங்குவர். ஊழல் குற்றச்சாட்டுகளில் பல பாதுகாப்புத்துறை அதிகாரிகளை நீதிமன்றம் தண்டித்தாலும், அரசியல்வாதிகள் மீது கடுமையான குற்றச்சாட்டுகள் எதுவும் முன்வைக்கப்படவில்லை.
பல வருட விசாரணையின் பின்னர், பாதுகாப்பு ஒப்பந்தம் தொடர்பான ஊழல் வழக்கில் ஜெயா ஜெட்லி மற்றும் இரண்டு பேரை சிபிஐ நீதிமன்றம் சமீபத்தில் தண்டித்தது. ஜெட்லிக்கு 4 ஆண்டு சிறைத் தண்டனை கிடைத்தாலும், உடனடியாக ஜாமீன் வழங்கப்பட்டது என்பது இந்தியாவில் உள்ள உண்மையான சட்டத்தையும் நீதியையும் பிரதிபலிக்கிறது. உறுதியான ஆதாரங்கள் இருந்தபோதிலும், சிபிஐ இறுதி தீர்ப்பை வழங்க ஏன் இவ்வளவு காலம் எடுத்துக் கொண்டது?
தெஹல்கா நடவடிக்கைக்குப் பிறகு, தனிநபர் ஆணையம் மூலம் நீதிபதி கே.வெங்கடசாமி பாதுகாப்பு ஒப்பந்தங்களில் ஊழல் குறித்து பத்திரிகை அம்பலப்படுத்தியதை விசாரித்தார். 20 மாதங்கள் உயர்மட்ட விசாரணைக்கு தலைமை தாங்கி, 181 அமர்வுகளை நடத்திய வெங்கடசாமி அரசியல் அழுத்தம் காரணமாக தனது ராஜினாமா செய்தார். அட்வான்ஸ் தீர்ப்புகளுக்கான அதிகாரசபையின் தலைவராக நியமிக்கப்பட்டதற்கு எதிராக எதிர்ப்புகள் உருவானதை தொடர்ந்து, தெஹல்கா நடவடிக்கைகளில் இருந்து விலகத் தீர்மானித்தார்.
ஜூலை 2003 முதல் தெஹல்கா வழக்கை விசாரித்து வந்த புகான் கமிஷனின் பதவிக்காலத்தை நீட்டிக்க அப்போதைய ஐக்கிய முற்போக்கு கூட்டணி அரசு மறுத்துவிட்டது. ஜார்ஜ் பெர்னாண்டசை குற்றமற்றவர் என்று புகான் கூறியது ஐக்கிய முற்போக்கு கூட்டணி அரசுக்கு பிடிக்கவில்லை என்பதை யாரும் மறுக்க முடியாது. சிபிஐ அரசியல்வாதிகள் மற்றும் பாதுகாப்புத்துறை அதிகாரிகள் மீது மொத்தம் 9 வழக்குகளை பதிவு செய்த போதிலும், சிறப்பு சிபிஐ நீதிமன்றம் பங்காரு லட்சுமனை தண்டிக்க 4 ஆண்டுகள் எடுத்துக் கொண்டது. ஜெயா ஜெட்லி வழக்கில், நீதிமன்றம் 8 ஆண்டுகள் எடுத்துக் கொண்டது.
இந்தியாவில் சாமானியர்களுக்கு நீதி என்பது ஒரு மாயை தவிர வேறில்லை. 1997ஆம் ஆண்டில், உச்சநீதிமன்றத்தின் தீர்ப்பு சிபிஐயின் சுதந்திரமான நடவடிக்கைகளை உறுதிப்படுத்த பல வழிகாட்டுதல்களை பட்டியலிட்டது. இங்கிலாந்தின் வழக்குரைஞர் இயக்குநர் அமைப்பு போலவே நடுநிலையான ஆணையத்தை அமைக்கவும், சிபிஐ மற்றும் அமலாக்க பிரிவு நடவடிக்கைகளை ஒழுங்குமுறை ஆணையத்திடம் ஒப்படைக்கவும் உச்சநீதிமன்றம் உத்தரவிட்டது. ஆனால் அடுத்தடுத்த அரசாங்கங்கள் உச்சநீதிமன்ற வழிகாட்டுதல்களை மீறி விசாரணை ஆணையத்தை அரசாங்கத்தின் மற்றொரு பிரிவாக மாற்றின.
உதாரணத்திற்கு தென் கொரியாவை எடுத்துக் கொள்ளுங்கள் - ஊழல் குற்றத்திற்காக அதிபர் 15 ஆண்டுகள் சிறையில் அடைக்கப்பட்டார். உலகின் மிகப்பெரிய ஜனநாயகம் என்று புகழ்பெற்ற இந்தியாவில் நிலைமை முற்றிலும் முரணானது. மிகவும் பழமையான குற்றவியல் நீதி அமைப்பு மற்றும் ஆதாரச் சட்டங்களை திருத்துவது, புதுமையான விசாரணை முறைகளைக் கொண்டுவருதல் மற்றும் சட்ட நடவடிக்கைகளில் தொழில்நுட்ப முன்னேற்றங்களை அறிமுகப்படுத்துதல் போன்றவை அனைவருக்கும் நீதி கிடைப்பதை உறுதி செய்யும். இது பல ஆண்டுகளாக நீடிக்கும் ஊழல் வழக்குகளுக்கு முற்றுப்புள்ளி வைத்து இந்திய அரசியலில் குற்றமயமாக்கலின் பரவலைக் குறைக்கும்.
