சென்னை பெருங்குடியைச் சேர்ந்த நபர் ஒருவர் அடையாறு சைபர் காவல் நிலையத்தில் புகார் ஒன்றை அளித்தார். அந்தப் புகாரில், கடந்த 9ஆம் தேதி டாட்டா கேப்பிட்டல் என்ற நிறுவனத்திலிருந்து பேசுவதாக கூறிய பெண் ஒருவர், தனிநபர் கடன் இரண்டு லட்சம் ரூபாய் வரை ஆன்லைன் மூலம் வழங்குவதாகத் தெரிவித்தார். இதனை நம்பி அந்த நபரிடம் ஆதார் ஆவணங்கள் மற்றும் வங்கி ஆவணங்கள் ஆகியவற்றை வழங்கினேன்.
அதன்பின் வந்த ஓடிபி-யை அந்தப் பெண்ணிடம் பகிர்ந்துகொண்டேன். இதனையடுத்து தனது வங்கிக் கணக்கிலிருந்து 20ஆயிரம் ரூபாய் திடீரென மாயமானது" எனக் குறிப்பிட்டுள்ளார். இது தொடர்பாக அடையாறு துணை ஆணையர் அலுவலகத்தில் உள்ள சைபர் கிரைம் காவல் துறையினர் வழக்குப்பதிவு செய்து விசாரணை நடத்தினர். தொடர்புகொண்ட செல்போன் எண்ணை சைபர் கிரைம் மூலமாக சிக்னலை வைத்து தேடுகையில் நாமக்கல் குமாரப்பாளையத்தில் இருப்பது தெரியவந்தது. அவை போலி கால் சென்டர் எண் என்பதும் உறுதியானது.
இதனைத்தொடர்ந்து சென்னை அடையாறு தனிப்படை காவல் துறையினர் நாமக்கல் மாவட்டம் குமாராபாளையம் சென்று போலி கால் சென்டரை சுற்றி வளைத்து, அங்கு பணிபுரிந்த பெண்கள், கும்பலின் தலைவர்கள் குமரேசன், விவேக் ஆகியோரை பிடித்தனர்.
பின்னர் நடத்தப்பட்ட விசாரணையில், "ஃபெதர் லைட் டெக்" என்ற பெயரில் போலி கால் சென்டர் நடத்தி மோசடி செய்தது கண்டுபிடிக்கப்பட்டது. பன்னிரண்டாம் வகுப்பு, டிப்ளமோ மற்றும் பட்டப்படிப்பு முடித்தவர்களுக்கு 8 ஆயிரம் முதல் 12 ஆயிரம் வரை சம்பளம் தருவதாகக் கூறி பலரையும் இந்தப் போலி கால் சென்டரில் பணிபுரிய வைத்ததும் தெரியவந்தது. இதில் பணிபுரியும் பெண்கள் பலர் தெரிந்தும் தெரியாமலும் இந்தப் போலி கால்சென்டர் மோசடியில் சிக்கியுள்ளனர்.
மேலும், இந்த சென்டரில் வேலை பார்த்த பெண்கள் உள்பட ஐந்து பேரை சென்னை தனிப்படை காவல் துறையினர் கைது செய்துள்ளனர். கைதான குமரேசன் எவ்வாறு இந்த மோசடியை அரங்கேற்றுகிறார் என்பதை பற்றி வாக்குமூலமாக தெரிவித்துள்ளார்.
தொலைபேசி மூலமாகவே எளிதில் கடன் பெற விரும்பும் நபர்களை ஆசை வலையில் வீழ்த்தி, அவர்களது ஆவணங்களை வைத்து ஆன்லைன் மூலமாகவே மோசடி செய்ததாக தெரிவித்தனர்.
இதையும் படிங்க: 'நாட்டின் உணவுப் பாதுகாப்புத் தூணை கேள்விக்குள்ளாக்கியுள்ள மத்திய அரசு' - ப.சிதம்பரம்
