கேரள மாநிலம் கொல்லம் பகுதியை அடுத்துள்ள கிளி கொல்லூரைச் சேர்ந்தவர் பாத்திமா லத்தீப் (18). இவர் சென்னை ஐஐடியில் முதலாமாண்டு முதுகலை அறிவியல் பிரிவில் மனிதநேயம் (MA Humanities) என்ற பட்டப்படிப்பு படித்து வந்துள்ளார். ஐஐடி வளாக சரவியூ விடுதியில் அறை எண் 349இல் தங்கியிருந்தார்.
நவம்பர் 8ஆம் தேதி இரவு தனது அறையில் தூக்கிட்டுத் தற்கொலை செய்துகொண்டார். இது தொடர்பாக கோட்டூர்புரம் காவல் துறையினர் வழக்குப்பதிவு செய்து விசாரித்துவருகின்றனர்.
இந்நிலையில், பாத்திமா லத்தீப்பின் தந்தை அப்துல் லத்தீப் தனது மகளின் இறப்பில் சந்தேகம் இருப்பதாகக் கூறி கேரள முதலமைச்சர் பினராயி விஜயனை, சந்தித்து மனு ஒன்றை அளித்தார். அதில், "தனக்கு மூன்று மகள்கள் உள்ளனர். தனது முதல் மகள் பாத்திமா லத்தீப் சென்னை ஐஐடியில் சேர்ந்து நுழைவுத் தேர்வில் முதல் மதிப்பெண் பெற்று, பட்டப்படிப்பு மேற்கொண்டுவந்தார்.
இந்நிலையில், நவம்பர் 9ஆம் தேதி பெண் கல்லூரி விடுதியின் அறையில் தூக்கிட்டுத் இறந்ததாகத் தகவல் வந்தது. இதனால், எனது மனைவி சென்னை சென்று, மகளின் உடலை வாங்கச் சென்றார். பின்னர், இது தொடர்பாக எனது நண்பர் கொல்லம் மேயர் ராஜேந்திர பாபுவுடன், சென்னை கோட்டூர்புரம் காவல் நிலையத்திற்குச் சென்று விசாரித்தோம்.
இது குறித்து எனது மகளின் செல்ஃபோனை ஆராயும்போது , அதில், 'எனது சாவுக்குக் காரணம் ஐஐடி பேராசிரியர் சுதர்சன் பத்மநாபன், ஹேமச்சந்திரன் காரா, மிலின் பிராமே ஆகியோர்தான்' என்று இறப்பதற்கு முன்னதாக குறிப்பிட்டுவிட்டு இறந்துள்ளார். கல்லூரி கேண்டீனில் அவளது நண்பருடன் 9.30 மணியளவில் பேசி அழுதுள்ளதாகவும் சிசிடிவியில் பதிவாகியுள்ளது.
ஆனால், கோட்டூர்புரம் காவல் துறையினர் சரியான முறையில் நடவடிக்கை எடுக்கவில்லை. உடனடியாக நடவடிக்கை எடுக்க வேண்டும்" எனக் குறிப்பிட்டிருந்தார்.
இதனையடுத்து அந்த மனுவை உடனடியாக தமிழ்நாடு முதலமைச்சர், தமிழ்நாடு காவல் துறை தலைமை இயக்குநர் திரிபாதி, காவல் ஆணையர் ஏ.கே. விஸ்வநாதன் ஆகியோரிடம் இந்த வழக்கை விசாரித்து உடனடியாக நடவடிக்கை எடுக்க வேண்டும் என கேரள முதலமைச்சர் வலியுறுத்தியுள்ளார்.
தற்போது இந்த விவகாரம் தொடர்பாக ஐஐடியில் உள்ள 11 பேராசிரியர்களிடமும் காவல் துறையினர் தீவிர விசாரணை மேற்கொண்டுவருகின்றனர்.
இதையும் படிங்க: கோவை இளம்பெண் விபத்து: அவசர வழக்காக விசாரிக்க டிராஃபிக் ராமசாமி மனு!
