புது டெல்லி : பாகிஸ்தானில் இம்ரான் கான் அரசுக்கு எதிராக, அந்நாட்டின் நாடாளுமன்றத்தில் இன்று (சனிக்கிழமை) நம்பிக்கை இல்லா வாக்கெடுப்பு நடக்கிறது. முன்னதாக வெள்ளிக்கிழமை (ஏப்.8) பாகிஸ்தான் மக்களுக்கு இம்ரான் கான் உரையாற்றினார்.
அப்போது மீண்டும் ஒருமுறை இந்தியாவை புகழ்ந்து பேசினார். “அந்நாட்டில் இருக்கும் அரசாங்கம், தங்களது நாட்டு பிரச்சினையில் வெளிநாட்டினரை தலையிட விடுவதில்லை” எனக் கூறினார்.
இது குறித்து முன்னாள் தூதர் ஜிதேந்திர திரிபாதி கூறுகையில், “இந்த மூன்றரை ஆண்டுகளாக இம்ரான் கான் அமைதி காத்தது ஏன்? தன் நாடு அடிமையாகி வருவதையோ, பொம்மை குடியரசாக மாறுவதையோ அவர் அறியவில்லையா? இது ஆச்சரியமாக உள்ளது” என்றார்.
தொடர்ந்து இம்ரான் கானின் விமர்சனத்தையும் ஜிதேந்திர திரிபாதி கேள்விக்குள்ளாக்கினார். அப்போது, “தன் நாடு 'வெளிநாட்டு சக்திகளுக்கு' விற்கப்பட்டு, 'அடிமை'யாகிவிட்டதையும், உறவுகளை சீர்படுத்த அவர் எந்த ஒரு காரியத்தையும் செய்யவில்லை. இதற்கிடையில் இந்தியாவை அவர் இழுத்துள்ளார்” என்றார்.
தொடர்ந்து, “தலைவர்கள் அமைதியாக வந்து செல்லும் வரை பாகிஸ்தானில் நிலவும் அரசியல் குழப்பம் இந்தியாவை பாதிக்காது. ஆனால் ராணுவம் கைப்பற்றி வன்முறை நடந்தால் நிச்சயம் அது பாதிக்கும். இல்லையெனில், அண்டை நாடுகளில் நிலையான அரசாங்கத்தை இந்தியா எப்போதும் வரவேற்கும்” என்றார்.
இந்த நிலையில் பாகிஸ்தானில் இம்ரான் கான் அரசுக்கு எதிராக இன்று நம்பிக்கை இல்லா தீர்மானத்தில் வாக்கெடுப்பு நடக்கிறது. இதில், ஒருவேளை அவர் தோல்வி அடைந்தால், அந்நாட்டில் நம்பிக்கையில்லா தீர்மானத்தின் அடிப்படையில் பதவியில் இருந்து இறக்கப்பட்ட முதல் பிரதமர் என்ற மோசமான சாதனைக்கு அவர் சொந்தக்காரர் ஆவார்.
இன்று நடைபெறும் நம்பிக்கையில்லா தீர்மானத்தில் இம்ரான் கான் சிக்ஸர் அடிப்பாரா அல்லது டக்அவுட் ஆகி வெளியேறுவாரா என்பதை பொருத்திருந்து பார்ப்போம்.
இதையும் படிங்க : பாகிஸ்தான் நாடாளுமன்றம் கலைப்பு செல்லாது; மீண்டும் நம்பிக்கை வாக்கெடுப்பு நடத்த உச்ச நீதிமன்றம் உத்தரவு
