காத்மண்டு : நேபாளம் தலைநகர் காத்மண்டுவில் சக்தி வாய்ந்த நிலநடுக்கம் ஏற்பட்டது. ரிக்டர் அளவு கோலில் 6 புள்ளி 1 என்ற அளவில் நிலநடுக்கம் பதிவானதாக தேசிய நில அதிர்வு கண்காணிப்பு மற்றும் ஆராய்ச்சி மையம் தெரிவித்து உள்ளது.
இந்த நிலநடுக்கத்தால் பெரியளவில் உயிர் சேதம் எதுவும் ஏற்படவில்லை என நேபாள அரசு தெரிவித்து உள்ளது. தாடிங் மாவட்டத்தில் காலை 7:39 மணிக்கு நில நடுக்கம் உணரப்பட்டதாக நில அதிர்வு ஆராய்ச்சி மையம் கூறி உள்ளது. பெரியளவில் உயிர் சேதம் ஏதும் ஏற்படவில்லை என்று கூறப்பட்டாலும், 75க்கும் மேற்பட்ட வீடுகள் சேதமானதாக தெரிவிக்கப்பட்டு உள்ளது.
அதேநேரம் 20க்கும் மேற்பட்ட வீடுகள் இடிந்து தரைமட்டமானதாக கூறப்பட்டு உள்ளது. முழு ஆய்வு பணிகள் நடைபெற்று வரும் நிலையில், சேத விபரம் அதிகரிக்கலாம் எனக் கூறப்படுகிறது. காலை 7:39 மணி அளவில் தாடிங் மாவட்டத்தில் அடுத்தடுத்து 4 முறை நிலம் குலுங்கியதாகவும், அருகாமை மாவட்டங்களான பாக்மதி மற்றும் கந்தகி வரை பூமி குலுங்கியது உணரப்பட்டதாகவும் அதிகாரிகள் தெரிவித்து உள்ளனர்.
அடுத்தடுத்து பூமி குலுங்கிய நிலையில், வீடுகளை விட்டு வெளியேறிய மக்கள் வீதிகளில் தஞ்சமடைந்து உள்ளனர். சக்தி வாய்ந்த நில நடுக்கம் ஏற்பட்ட போதும் சுனாமி எச்சரிக்கை ஏதும் விடுக்கப்படவில்லை எனக் கூறப்படுகிறது. நேபாளத்தில் நில நடுக்கம் என்பது சாதாரண விஷயமாக பார்க்கப்படுகிறது.
திபத் மற்றும் இந்திய டெக்டானிக் தட்டுகள் ஒன்றிணையும் பகுதியில் நேபாளம் உள்ள நிலையில், டெக்டானிக் தட்டுகளுக்கு இடையே ஏற்படும் நெரிசல்கள் காரணமாக நேபாளத்தில் அடிக்கடி நிலநடுக்கம் ஏற்படுவதாக கூறப்படுகிறது.
இதையும் படிங்க : முகமது நபி குறித்து அவதூறு கருத்து வெளியிட்ட எம்.எல்.ஏவின் இடைநீக்கம் ரத்து! தெலங்கானா தேர்தலையொட்டி பாஜக சூட்சமம்!
